Արթիկի հրապարակում տեղադրված Հայրենական մեծ պատերազմի (1941-1945 թթ.) զոհերի հիշատակին նվիրված հուշարձանի ապամոնտաժման ծրագրի նախապատրաստումը հարված է մեր պատմական հիշողությանը։ Այս մասին հայտարարել է ԱԺ «Հայաստան» խմբակցության պատգամավոր Մհեր Մելքոնյանը։

Նրա խոսքով՝ այս հուշարձանը մեր պատմության, հաղթանակի և զոհաբերության խորհրդանիշն է։

«Ոչ մի տեղական ՔՊ-ական պաշտոնյա իրավունք չունի որոշելու մեր պատմական ժառանգության ճակատագիրը՝ առանց մասնագիտական գնահատականի, հանրային քննարկման և օրենքով սահմանված կարգի։

Հուշարձանի վերաբերյալ ցանկացած միակողմանի գործողություն, նույնիսկ «վերանորոգման» պատրվակով, անընդունելի է, վտանգավոր նախադեպ և քաղաքական սադրանք։»

Պատգամավորը պահանջում է.

• կառավարությունից և ԿԳՄՆ նախարարությունից՝ պաշտոնական հերքում հուշարձանի ապամոնտաժման կամ տեղափոխման վերաբերյալ որևէ գործողության.
• Արթիկի ղեկավարությունից՝ մեկ շաբաթվա ընթացքում հրապարակայնորեն հերքել հուշարձանը ապամոնտաժելու ծրագրերը.
• «Քաղաքացիական պայմանագիր» կուսակցությունից՝ պարզաբանել, թե արդյոք սա կուսակցության դիրքորոշումն է.
• մասնագիտական գնահատական՝ հուշարձանի տեխնիկական վիճակի վերաբերյալ։

«Այս հուշարձանը պարզապես քարե կոնստրուկցիա չէ։ Այն խորհրդանիշ է հերոսության, կորստի և հաղթանակի։ Այն մեր քաղաքային մշակույթի, պատմության և ազգային հպարտության մասն է», — ընդգծել է Մելքոնյանը։

Նա նաև նշել է, որ ՔՊ-ի յուրաքանչյուր պատասխանատու պաշտոնյան, ով ներգրավված լինի այս գործընթացում, պետք է պատրաստ լինի կրելու քաղաքական և իրավական պատասխանատվություն։