Եթե «Հայաստանի էլեկտրական ցանցեր» ընկերությունը պետականացվի, սակագնի և էլեկտրամատակարարման որակի խնդիրներն արագ կառաջանան։ Այդ մասին սոցցանցերում հրապարակված տեսանյութում հայտարարել է ՀԷՑ ՓԲԸ տնօրենների խորհրդի նախագահ Նարեկ Կարապետյանը՝ ներկայացնելով ընկերության գործունեությունը և հնարավոր ռիսկերը։

Նախ Կարապետյանը պարզաբանեց, թե ինչպես է աշխատում էներգահամակարգը և ինչպես է էլեկտրաէներգիան հասնում սպառողներին։

«Պարզ օրինակով, երբ քաղաքացին միացնում է լույսը, մեկնարկում է մի ամբողջ գործընթաց. մետաղալարերը և գետնի տակի ցանցերն ակտիվանում են։ ՀԷՑ–ը պատասխանատու է բնակավայրերում էլեկտրամատակարարումն ապահովելու համար, սակայն խոշոր վթարների դեպքում պատասխանատվությունը դուրս է գալիս մեր լիազորությունների շրջանակից»,— առանձնացրեց նա։

2016 թվականին «Էլեկտրիկ Երևան» շարժումից հետո, երբ «Տաշիր» խումբը ձեռք բերեց ՀԷՑ–ը, ընկերությունը գտնվում էր սնանկության եզրին, իսկ էներգահամակարգը ուներ զգալի կորուստներ։ Վերափոխումների շնորհիվ կարողացան կայունացնել գործընթացը և նույնիսկ փակել նախկին կառավարման պարտքերը։

ՀԷՑ–ն այսօր Հայաստանում ունի ամենամեծ թվային հաշվառման համակարգը, որին միացված է 800 հզ. սպառող։ Անձնակազմի կրճատումների դիմաց վճարվել է ավելի քան 30 մլն դոլար աշխատավարձ՝ այդ գումարն ամբողջությամբ ծածկելով ընկերության միջոցներով։

Վերջին տարիներին աճել է էլեկտրաէներգիայի պահանջարկը, հատկապես Երևանում, ինչը հանգեցրել է ցանցի գերբեռնվածության և հաճախակի վթարների։ Սխալ ժամանակին չախտորոշելով խնդիրը՝ այժմ ընկերությունը ներդրումներ է կատարում նոր ենթակառուցվածքների կառուցման մեջ։

Նարեկ Կարապետյանը մտահոգություն հայտնեց ՀԷՑ–ի պետականացման վերաբերյալ՝ նշելով, որ կարճաժամկետ հեռանկարում դա կարող է հանգեցնել ծառայությունների դեֆիցիտի և սակագնի աճի։ Ի հակադրություն մասնավոր մոդելի, որը արդյունավետություն է ապահովում, պետական ղեկավարման օրինակները Ադրբեջանում և Իրանում ցույց են տալիս կորուստների մեծ մակարդակ։

Կարապետյանը կոչ արեց պետությանը լուրջ մոտեցում ցուցաբերել էներգետիկ ոլորտի բարեփոխումներին՝ նախապես ուժեղացնելով ոլորտային կառավարումը։