ՄԻՆՍԿ, 2 ՀՈՒԼԻՍ – Բելառուսն ու Ռուսաստանը կստորագրեն համաձայնագիր Բելառուս-Ռուսական համալսարանի գործունեության պայմանների վերաբերյալ։ Նախագահ Ալեքսանդր Լուկաշենկոն հաստատել է բանակցությունների անցկացումը համաձայնագրի նախագծի շուրջ և լիազորել է կրթության նախարարությունը դրանք իրականացնելու։ Այդ մասին տեղեկացրել է նախագահի մամուլի ծառայությունը։

«Պետության ղեկավար Ալեքսանդր Լուկաշենկոն հուլիսի 2-ին ստորագրել է № 267 հրամանագիրը, որով որպես բանակցությունների հիմք հաստատել է Բելառուսի և Ռուսաստանի միջկառավարական համաձայնագրի նախագիծը՝ Բելառուս-Ռուսական համալսարանի գործունեության պայմանների մասին։ Այս միջպետական պայմանագրով հստակեցվում են համալսարանի կարգավիճակն ու գործունեության հիմնական դրույթները, որոնք վերաբերում են, մասնավորապես, կրթական նպատակներին, ընդունելության կանոններին ու կարգին, կառավարման մարմիններին», – նշել է մամուլի ծառայությունը։

Հաղորդագրության մեջ նշվում է, որ համաձայնագրի կնքումը կնպաստի երկու երկրների միջև հարաբերությունների զարգացմանն ու ամրապնդմանը։ «Համաձայնագրի նախագծի շուրջ բանակցություններն իրականացնելու և այն ստորագրելու լիազորությունները տրվել են կրթության նախարարությանը», – նշված է փաստաթղթում։

Բելառուս-Ռուսական համալսարանը ստեղծվել է Մոգիլյովի պետական տեխնիկական համալսարանի հիման վրա։ Այն երկու երկրների համատեղ կառավարման բարձրագույն կրթության միջպետական հաստատություն է և ունի երկու երկրների պետական համալսարանների կարգավիճակ։

Բելառուսի կրթական ծրագրերով՝ համալսարանի գոյության ընթացքում պատրաստվել է ավելի քան 50 հազար տեխնիկական և տնտեսական մասնագետ, իսկ Ռուսաստանի ծրագրերով՝ ավելի քան 1,5 հազար մասնագետ և բակալավր։

Համալսարանում կրթություն են ստանում մոտ 4 հազար ուսանող՝ ընդհանուր, մասնագիտացված և խորացված բարձրագույն կրթության ծրագրերով՝ ցերեկային և հեռակա ձևերով, իսկ 300-ը՝ օտարերկրյա ուսանողներ են։ Ուսանողների ընդհանուր թիվը (համալսարան, քոլեջ, լիցեյ և կադրերի վերապատրաստման ինստիտուտ) կազմում է մոտ 5 հազար մարդ։