ՄՈՍԿՎԱ, 2 հուլիսի — Իրանի միջուկային օբյեկտները լուրջ վնասվել են ԱՄՆ-ի հարձակումից հետո: Այս մասին հայտարարել է երկրի արտաքին գործերի նախարար Աբբաս Արաքչին CBS News հեռուստաալիքին տված հարցազրույցում:

«Ոչ ոք ճշգրիտ չգիտի, թե ինչ է տեղի ունեցել Ֆորդոյում: Սակայն այս պահին մենք գիտենք, որ օբյեկտները լուրջ և ծանր վնասվել են: Իրանի միջուկային էներգիայի կազմակերպությունը այժմ գնահատում և վերլուծում է իրավիճակը, և զեկույցը կներկայացվի կառավարությանը», — ասել է նախարարը:

Նա հստակեցրել է, որ հարձակումներից առաջացած վնասի ճշգրիտ գնահատական դեռ չկա: Արաքչին նաև նշել է, որ Իրանում սպասում են մասնագետների կարծիքին՝ միջուկային օբյեկտները վերագործարկելու հնարավորության վերաբերյալ:

ԱՄՆ-ն հունիսի 22-ի գիշերը հարվածել է Իրանի երեք միջուկային օբյեկտներին՝ Նատանզում, Ֆորդոյում և Իսֆահանում: Վաշինգտոնի պնդմամբ, այս հարձակումը նախատեսված էր Իրանի միջուկային ծրագիրը ոչնչացնելու կամ լուրջ թուլացնելու համար:

Թեհրանը հունիսի 23-ի երեկոյան հրթիռային հարվածներ է հասցրել ԱՄՆ-ի Քաթարում գտնվող Ալ Ուդեյդ ռազմակայանին՝ ընդգծելով, որ իրանական կողմը չի պատրաստվում հետագա էսկալացիայի գնալ:

ԱՄՆ նախագահ Դոնալդ Թրամփը դրանից հետո արտահայտել է հույս, որ ԱՄՆ-ի ռազմակայանի վրա հարվածով Իրանը «ազատվել է լարվածությունից», և այժմ հնարավոր է խաղաղության և համաձայնության ճանապարհը Մերձավոր Արևելքում: