Բելառուսի նախագահ Ալեքսանդր Լուկաշենկոն հայտարարել է, որ ԱՄՆ-ն առաջարկել է բանակցություններ վարել Մինսկի հետ։ Նա նշել է, որ 2020 թվականի ընտրություններից հետո ամերիկյան կողմը հրաժարվել էր իրեն նույնիսկ «նախագահ» անվանելուց։

Անկախության օրվա հանդիսավոր հավաքի ժամանակ ելույթ ունենալիս՝ Լուկաշենկոն նշել է, որ բարձր մակարդակի հանդիպումներ են տեղի ունենում, որոնք ըստ նրա՝ «հետաքրքրում են իշխանություններին և քաղաքացիներին»։ Ելույթի մի մասը հրապարակվել է նախագահի մամուլի ծառայությանը մոտիկ «Пул первого»-ի թելեգրամյան ալիքում։

Լուկաշենկոն հայտնել է, որ հունիսի 21-ին ԱՄՆ նախագահի Ուկրաինայի հարցերով հատուկ բանագնաց Քիթ Քելլոգի գլխավորած պատվիրակությունը հանդիպել է Բելառուսի ներկայացուցիչների հետ։ Քննարկվել են հակառուսական ու հակաեվրոպական պատժամիջոցները, Ուկրաինայի և Մերձավոր Արևելքի հակամարտությունները, ինչպես նաև Մինսկի հարաբերությունները Մոսկվայի ու Պեկինի հետ։

«Կարևորն այն է, որ նրանք, ովքեր 2020 թվականին ինձ նույնիսկ «նախագահ» չէին անվանում, այսօր գալիս են և ընդունում, որ Բելառուսն ունի իր նախագահը ու պետք է նրա հետ բանակցի», — ասել է Լուկաշենկոն։

Նա նշել է, որ սա նմանատիպ չորրորդ կամ հինգերորդ հանդիպումն է, որին մասնակցում են մասնագետներ, քաղաքականությունը ղեկավարող անձինք։ Լուկաշենկոն նաև հայտարարել է, որ բանակցությունների ընթացքում, ամերիկյան կողմի խնդրանքով, Բելառուսն ազատ է արձակել 14 բանտարկյալի։