Հյուսիսային Կորեայի առաջնորդ Կիմ Չեն Ընը հարգանքի տուրք է մատուցել Ուկրաինա-Ռուսաստան պատերազմում զոհված հյուսիսկորեացի զինվորներին։ Նա ձեռքը դրել է հայրենիք վերադարձված դագաղների վրա, ինչը հաստատում է, որ երկրի զինվորները կորուստներ են կրել հակամարտության ժամանակ։

Իրադարձությունները տեղի են ունեցել Հյուսիսային Կորեայի և Ռուսաստանի միջև ռազմական դաշինտի առաջին տարեդարձին նվիրված հանդիսավոր միջոցառման ժամանակ։ Լուսանկարներում երևում է, որ Կիմ Չեն Ընը կանգնած է վեց դագաղների առջև, որոնք ծածկված են երկրի դրոշով։

Միջոցառումն անցկացվել է Փհենյանի Մեծ թատրոնում՝ միավորելով հյուսիսկորեացի և ռուս երգիչների ելույթները։ Այնտեղ ցուցադրվել են նաև հիշեցումներ Կիմի և Ռուսաստանի նախագահ Վլադիմիր Պուտինի միջև անցյալ տարվա հունիսին ստորագրված պաշտպանական պայմանագրի մասին։

Տեսանյութում, որտեղ երևում են Կիմ Չեն Ընը և զոհված զինվորների աճյունները, ներառվել են նաև երկու երկրների զինծառայողների կադրեր՝ իրենց ազգային դրոշներով։ Հատկանշական է, որ լուսանկարներից մեկում պատկերված է արյունոտ նոթատետրի էջ, որը, ենթադրաբար, պատկանել է հյուսիսկորեացի զինվորի և գտնվել Ռուսաստանի Կուրսկի մարզում։

Նոթատետրում հայտնաբերված գրառումների համաձայն՝ նշված է. «Վճռական պահը վերջապես հասել է» և «Եկեք քաջաբար պայքարենք այս սրբազան պատերազմում՝ մեր Գերագույն հրամանատարի սիրով և վստահությամբ»։

Հայրենադարձման ճշգրիտ ամսաթիվը պարզ չէ։ Կիմ Չեն Ընը և այլ պաշտոնյաներ, այդ թվում՝ նրա քույրը՝ Կիմ Յո Չժոնը և արտաքին գործերի նախարար Չհո Սոն Հուեյը, հագել են ձմեռային հագուստ, ինչը հուշում է, որ զինվորների աճյունները Հյուսիսային Կորեա են վերադարձվել մի քանի ամիս առաջ։