ՄԻՆՍԿ, 1 հուլիսի — Բելառուսի Քննչական կոմիտեն հայտնում է, որ Բելառուս-Լիտվա սահմանի մոտ հայտնաբերվել է ծեծված միգրանտի մարմին, և քրեական գործ է հարուցվել։

«Հունիսի 27-ի երեկոյան մեր երկրի սահմանապահները Վերխնեդվինսկի շրջանում՝ Լատվիայի հետ սահմանի մոտ, գտել են կյանքի նշաններ չունեցող օտարերկրացու», — ասված է Բելառուսի Քննչական կոմիտեի հաղորդագրության մեջ։

Հաղորդվում է, որ զոհի մոտ բացակայել են բջջային հեռախոսը, փողը, անձնական իրերը և փաստաթղթերը, ինչը կարող է վկայել այն մասին, որ նա բռնի վտարվել է Լատվիայի տարածքից։ Զոհի ինքնությունը հաստատվել է՝ դա 29-ամյա Էրիթրեայի քաղաքացի է։

Քննչական կոմիտեի տվյալներով՝ տղամարդը դաժան ծեծի է ենթարկվել։ Նրա մոտ հայտնաբերվել են որովայնի բութ վնասվածք, փայծաղի պատռվածք և աղիքի վնասվածք, որոնք բարդացել են ներորովայնային ուժեղ արյունահոսությամբ։ Քրեական գործ է հարուցվել մարդու մահ պատճառած ծանր մարմնական վնասվածք հասցնելու մասին հոդվածով։

Բելառուսի պետական սահմանապահ կոմիտեի մամուլի ծառայությունը հայտնել է, որ փախստականի մարմինը գտնվել է Լատվիայի արգելապատնեշի անմիջական հարևանությամբ՝ Վիտեբսկի մարզի Վերխնեդվինսկի շրջանում։

«Ընթացիկ տարվա սկզբից սա արդեն իններորդ դեպքն է Բելառուս-Լատվիա սահմանի հատվածում։ Նախորդ դեպքը գրանցվել է մայիսի 21-ին։ 2021 թվականից սկսած՝ Բելառուսի և Եվրամիության սահմանի վրա զոհված փախստականների ընդհանուր թիվը հասել է 75-ի», — նշված է սահմանապահ կոմիտեի հաղորդագրության մեջ։

2021 թվականին Լիտվան, Լատվիան և Լեհաստանը հայտնել էին Մերձավոր Արևելքի և Աֆրիկայի անօրինական միգրանտների թվի աճի մասին Բելառուսի հետ սահմանի վրա՝ մեղադրելով Մինսկին միգրացիոն ճգնաժամ ստեղծելու մեջ։ Բելառուսի կողմը կտրականապես մերժել է մեղադրանքները։

Բելառուսի սահմանապահները հայտարարել են, որ ԵՄ հարևան երկրերը բռնի վտարում են միգրանտներին Բելառուսի տարածք և նշել են փախստականների մարմիններ գտնելու դեպքեր, որոնք տուժել են այդ երկրերի գործողություններից։