ԲԱԿՈՒ, հունիսի 30. Ադրբեջանի ոստիկանությունը հանել է շրջափակումը Բաքվում գտնվող Sputnik Ադրբեջան գործակալության գրասենյակի մոտ: Շենքի մուտքի մոտ հերթապահում են ոստիկանության պարեկային ծառայության աշխատակիցները:

Ավելի վաղ՝ երկուշաբթի օրը, Ադրբեջանի ՆԳՆ հայտարարել էր «գործողության» մասին, որը տեղի է ունենում Sputnik Ադրբեջան գործակալության Բաքվի գրասենյակում: Մոսկվայում գտնվող Sputnik գործակալությունը հայտնել էր, որ կապ չկա Բաքվի խմբագրության հետ: Հետագայում Sputnik-ը հաղորդել էր, որ ադրբեջանական ուժայինները ձերբակալել են երկու ռուս լրագրողների՝ Sputnik Ադրբեջան խմբագրության ղեկավար Իգոր Կարտավիխին և գլխավոր խմբագիր Եվգենի Բելոուսովին՝ անհեթեթ մեղադրանքներով: Ռուսաստանի ԱԳՆ-ում հայտնել էին, որ Ադրբեջանի դեսպանը հրավիրվել է ՌԴ ԱԳՆ՝ Բաքվի ոչ բարեկամական գործողությունների և ռուս լրագրողների անօրինական ձերբակալության կապակցությամբ:

Այժմ Ադրբեջանի ուժային կառույցների մեքենաները և սև միկրոավտոբուսները հեռացել են Sputnik Ադրբեջան գործակալության գրասենյակի տարածքից: Ոստիկանության կողմից տարածքի շրջափակումն ամբողջությամբ հանվել է: Տեղում հերթապահում են Ադրբեջանի ՆԳՆ պարեկային ծառայության աշխատակիցները: Շենք մուտք գործելը դեռ արգելված է:

Փետրվարին Ադրբեջանի ԱԳՆ հայտարարել էր Sputnik գործակալության գործունեությունը հանրապետությունում դադարեցնելու մտադրության մասին: Sputnik խմբագրությունը հայտնել էր, որ ոչ մի պաշտոնական արգելք Ադրբեջանում աշխատելու վերաբերյալ չի ստացվել, և այդ ամբողջ ընթացքում երկու երկրների ԱԳՆ աշխատանքային խմբերի միջև շարունակվել է կառուցողական երկխոսությունը՝ հնարավոր տարաձայնությունները կարգավորելու թեմայով: