Տեհրան, հունիսի 30. Իրանը շարունակում է կապերն ու խորհրդակցությունները «Եվրոյի եռյակի» (Մեծ Բրիտանիա, Ֆրանսիա, Գերմանիա) հետ, սակայն բանակցությունների նոր ամսաթիվը դեռ չի որոշվել։ Այս մասին հայտարարել է Իրանի արտաքին գործերի նախարարության ներկայացուցիչ Իսմայիլ Բագաը։

«Իրանը լավ դիվանական հարաբերություններ ունի եվրոպական երկրների հետ և մշտական կապի մեջ է նրանց հետ տարբեր մակարդակներում: Այս առնչությամբ՝ երեկ երեկոյան մեր նախագահը բանակցություններ է վարել ֆրանսիացի իր գործընկերի հետ։ Իրանն ու Եվրոյի եռյակը շարունակում են կապերն ու խորհրդակցությունները կոնկրետ հարցերով, ներառելով բանակցությունների շարունակությունը։ Սակայն դրանց ճշգրիտ ամսաթիվը դեռ չի սահմանվել»,– ասել է Բագաը մամլո ասուլիսում։

Նա նշել է, որ այս պահին նոր բանակցություններ անցկացնելն անիմաստ է։ Իրանի կարծիքով՝ երեք եվրոպական երկրները պետք է վերանայեն Իրանի նկատմամբ իրենց մոտեցումները։

Նախորդ՝ հունիսի 20-ին, Իրանի ԱԳ նախարար Աբաս Արաքչին մասնակցել էր Մեծ Բրիտանիայի, Ֆրանսիայի ու Գերմանիայի գործընկերների հետ բանակցություններին՝ Ժնևում՝ Իրան-Իսրայել հակամարտության սրման ֆոնին քննարկելով միջուկային հարցը և Մերձավոր Արևելքի իրավիճակը։ Սակայն դրանից հետո ԱՄՆ-ը հարվածներ հասցրեց Իրանի միջուկային օբյեկտներին։

Իսրայելը հունիսի 13-ի գիշերը սկսել է ռազմական գործողություն Իրանի դեմ՝ մեղադրելով վերջինիս գաղտնի ռազմամիջուկային ծրագրի իրականացման մեջ: Օդային հարվածների և դիվերսիոն խմբերի գործողությունների թիրախ են դարձել ատոմային օբյեկտները, բարձրաստիճան զինվորականները, միջուկային ֆիզիկոսները և օդային բազաները: Իրանը մերժել է մեղադրանքները և պատասխանել է իր հարձակումներով։

Կողմերը 12 օր շարունակ փոխանակել են հարվածներ, որին միացել է նաև ԱՄՆ-ը՝ հունիսի 22-ի գիշերը միանվագ հարված հասցնելով Իրանի միջուկային օբյեկտներին։ Դրանից հետո՝ հունիսի 23-ի երեկոյան, Տեհրանը հրթիռային հարվածներ է հասցրել ԱՄՆ-ի Էլ-Ուդեյդ ռազմակայանին՝ Կատարում, հայտարարելով, որ իրանական կողմը չի պատրաստվում հրահրել լարվածության հետագա սրման։

ԱՄՆ նախագահ Դոնալդ Թրամփը դրանից հետո հույս է հայտնել, որ Կատարում ամերիկյան ռազմական բազային հասցված հարվածով Իրանը «դադարեցրել է լարվածությունը», և այժմ հնարավոր է դառնում Մերձավոր Արևելքում խաղաղությանն ու համաձայնությանը հասնելու ճանապարհը։ Նա նաև հայտարարել էր, որ Իսրայելն ու Իրանը պայմանավորվել են զինադադար կնքել, որը 24 ժամվա ընթացքում պետք է դառնա «պաշտոնական ավարտ 12-օրյա պատերազմի»։