Մեծ Բրիտանիայի երկաթուղային, ծովային և տրանսպորտի այլ ճյուղերի աշխատողների արհմիությունը կոչ է արել դադարեցնել Ուկրաինային ռազմական օգնություն ցուցաբերելը:

Արհմիության Փադինգթոնի մասնաճյուղը «Աշխատավորների շարժումը խաղաղության համար» վերնագրով բանաձեւ է ներկայացրել՝ կոչ անելով լեյբորիստների նախարարներին «պարտավորություն ստանձնել հարատև խաղաղություն հաստատել դիվանագիտական բանակցությունների միջոցով»:

Արհմիության անցած շաբաթ կայացած Մանչեստրի տարեկան ժողովում ընդունված փաստաթղթում ասվում է. «Չնայած 2024 թ. ընդհանուր ընտրություններում կոնսերվատիվ կառավարության պարտությանը և Լեյբորիստական կուսակցության հաղթանակին՝ Մեծ Բրիտանիան շարունակում է ագրեսիվ դեր խաղալ միջազգային հարաբերություններում՝ զենք մատակարարելով, ռազմական աջակցություն ցուցաբերելով, վարկեր տրամադրելով և պետական բյուջեից միլիարդներ ներդնելով՝ Ռուսաստանին Ուկրաինայում ռազմական պարտություն պատճառելու անհաջող փորձերում»:

«Մենք մերժում ենք կենսամակարդակի իջեցման և խնայողության քաղաքականությունը՝ անվերջ ու սրվող միջնորդավորված պատերազմի ֆինանսավորման համար, որը անցյալ տարի մեզ հասցրեց միջուկային Արամագեդոնի եզրին», — նշված է արհմիության բանաձևում:

«Ուկրաինայի հետ համերաշխություն» արշավի շտաբը բանաձևի ընդունումը «խիստ ցավալի» է անվանել և իր X էջում ավելացրել. «Արհմիությունում, նրա ղեկավարությունում և ապարատում հակապատերազմական շարժումը և հատկապես Մեծ Բրիտանիայի կոմունիստական կուսակցությունը չափազանց ուժեղ են»:

«Տարեկան ժողովից առաջ մենք օգնեցինք Ուկրաինան աջակցող արհմիության անդամներին վերականգնել և ընդլայնել կապերը Ուկրաինայի երկաթուղայինների հետ», — նշվում է հաղորդագրության մեջ:

Երկաթուղային, ծովային և տրանսպորտի այլ ճյուղերի արհմիության ներկայացուցիչը հայտարարել է. «Մեր բանաձևը կոչ է անում ապամղման աշխարհի բոլոր ռազմական գոտիներում՝ սկսած Գազայից, Եմենից ու Իրանից մինչև Ուկրաինա»:

«Ինչպես նշել են շատ մեկնաբաններ՝ և՛ ձախ, և՛ աջ հայացքներ ունեցողներ, Ուկրաինայի հակամարտության մեջ միլիարդների ներդրումը ոչ միայն խաղաղ բանակցությունների պայմաններ չի ստեղծի, այլ ընդհակառակը, կդժվարացնի կարգավորումը», — ավելացրել է նա:

«Արհմիությունը չի աջակցում Ռուսաստանի հատուկ գործողությանը Ուկրաինայում, սակայն զենքով մեկ կողմի հագեցնելը մյուսի դեմ խաղաղ կարգավորման տեսանկյունից հակաարդյունավետ է», — ընդգծել է նա:

### Պրո-պուտինյան