ԱՆԿԱՐԱ, 30 հունիսի։ Թուրքիայի կողմը հույս ունի, որ Ռուսաստանի և Ուկրաինայի պատվիրակությունների հնարավոր երրորդ բանակցությունները Ստամբուլում կլինեն կոնստրուկտիվ և կօգնեն առաջ մղել հակամարտության կարգավորման գործընթացը։ Այդ մասին երկուշաբթի հայտարարել է թուրք դիվանագիտական աղբյուրը։

«Մենք ակնկալում ենք, որ գործընթացի կառուցողական շարունակությունը կնպաստի շահերի հաշտեցմանը»,― ասել է նա՝ մեկնաբանելով Թուրքիայի սպասելիքները նախատեսվող բանակցությունների վերաբերյալ։

Թուրքիայի արտաքին գործերի նախարար Հաքան Ֆիդանն ավելի վաղ հայտնել էր, որ խոսակցություններ է ունեցել Ռուսաստանի և Ուկրաինայի պատվիրակությունների հետ և նշել, որ երրորդ փուլի բանակցությունների անցկացման պատրաստակամություն կա։

Ռուսաստանի նախագահի մամլո խոսնակ Դմիտրի Պեսկովն ավելի վաղ նշել էր, որ մոտ ապագայում Ուկրաինայի հետ հանդիպումներ նախատեսված չեն, իսկ երրորդ փուլի ժամկետները հույս կա, որ կպարզվեն մոտ օրերին։

Ռուսաստանի և Ուկրաինայի միջև երկրորդ բանակցությունները տեղի էին ունեցել 2 հունիսին Թուրքիայում։ Կողմերը փոխանակել էին հակամարտության կարգավորման վերաբերյալ մեմորանդումներ։

Ինչպես Ռուսաստանի պատվիրակության ղեկավար Վլադիմիր Մեդինսկին հայտնել էր բանակցությունների արդյունքներով, Ռուսաստանը և Ուկրաինան, մասնավորապես, պայմանավորվել էին մասշտաբային գերիների փոխանակման մասին։ Մեդինսկին ընդգծել էր, որ Ռուսաստանը կատարել է Ստամբուլում տված խոստումները։