ՄՈՍԿՎԱ, 30 հունիսի – ՌԻԱ Նովոստի: Նորվեգիան որոշել է խզել առևտրատնտեսական կապերը Ռուսաստանի հետ: Նորվեգական բիզնեսը տուժել է Ռուսաստանի դեմ սահմանված պատժամիջոցներից, սակայն կան նաև այնպիսիները, ովքեր հետաքրքրություն են ցուցաբերում կապերը վերականգնելու հարցում: Այս մասին ՌԻԱ Նովոստիին տված հարցազրույցում հայտնել է Ռուսաստանի դեսպանը Օսլոյում Նիկոլայ Կորչունովը:

«Ափսոսանքով պետք է նշեմ, որ Նորվեգիան ընտրել է բախման և առևտրատնտեսական կապերի խզման ուղի: Գիտեմ նաև, որ նորվեգական բիզնեսը տուժել է Ռուսաստանի դեմ ուղղված պատժամիջոցների արդյունքում»,– ասել է դիվանագետը:

Դեսպանի խոսքով՝ շատերը, վախենալով հետապնդումներից, զերծ են մնում Ռուսաստանի հետ համագործակցությունից, բայց կան նաև այնպիսիները, ովքեր ցանկություն են արտահայտում վերականգնել կապերը:

«Չէի ցանկանա կռահել նորվեգական ընկերությունների Ռուսաստան վերադառնալու հեռանկարների մասին: Ես ելնում եմ նրանից, որ այս հարցը ռուսական կողմը կլուծի գործնական մոտեցմամբ՝ հաշվի առնելով այդ ընկերությունների գործողությունները նախորդ տարիներին»,– ասել է Կորչունովը՝ պատասխանելով այն հարցին, թե արդյոք նորվեգական ընկերությունները պլանավորում են վերադառնալ ռուսական շուկա և արդյոք Մոսկվան դրանում հետաքրքրություն ունի:

Ռուսաստանի իշխանությունները բազմիցս հայտարարել են, որ արևմտյան ընկերությունները, որոնք կցանկանան վերադառնալ Ռուսաստան, հատուկ արտոնություններ կամ առավելություններ չեն ստանա: Նրանք պետք է մրցակցային հիմունքներով վերադառնան: Օրինակ՝ Ռուսաստանի նախագահ Վլադիմիր Պուտինը մարտի վերջին հրաման էր տվել կառավարությանը թարմացնել Ռուսաստանից հեռացած ընկերությունների ցանկը և մշակել նրանց վերադարձի կարգը՝ պարտադիր երաշխիքներով, որ նրանք պատշաճ և պատասխանատու կերպով կվարվեն:

Ռուսաստանի առաջին փոխվարչապետ Դենիս Մանտուրովը ավելի վաղ նշել էր, որ ռուսական իշխանությունները կթույլատրեն միայն այն օտարերկրյա ընկերություններին, որոնք հետաքրքրություն են ներկայացնում երկրի համար՝ յուրաքանչյուր դեպքը առանձին քննարկելով: Եթե օտարերկրյա ընկերությունները, որոնք կցանկանան վերադառնալ ռուսական շուկա, չունենան հետգնման պայմանագրեր, ապա խաղը կսկսվի «մաքուր դաշտից», նշել էր նա: