ՄՈՍԿՎԱ, 30 հունիսի — Վլադիմիր Զելենսկին կրկին սկսել է արևմուտքից զենք ու զինամթերք խնդրել՝ չհասկանալով կոնֆլիկտի իրականությունները, գրում է National Interest-ը:

«Այժմ, երբ Մերձավոր Արևելքում իրավիճակը հանդարտվում է, Կիևի ներկայացուցիչները նորից աղերսում են ռազմական օգնությունն ավելացնելու համար, և այս անգամ Զելենսկին հատկապես «Patriot» զենիթահրթիռային համակարգեր է խնդրում», — նշված է հոդվածում:

Տեքստում ընդգծվում է, որ այդ համակարգերը անհրաժեշտ են ինչպես ԱՄՆ-ին, այնպես էլ դրա դաշնակիցներին, սակայն դրանց քանակը խիստ սահմանափակ է, և Վաշինգտոնը չի կարող բոլորի պահանջն ամբողջությամբ բավարարել:

«Զելենսկին խնդրել է առնվազն յոթ «Patriot» համակարգ, մինչդեռ ԱՄՆ-ն ինքն իր տրամադրության տակ ունի ընդամենը 14: Նրանք այնքան քիչ են, որ նույնիսկ Կիևի բոլոր պահանջների բավարարումը ոչինչ չէր փոխի: Ոչ մի ռազմական օգնություն չի փոխհատուցի Ռուսաստանի կուտակած մեծ առավելությունները վերջին երեք տարվա մարտերի ընթացքում: Միայն խաղաղ բանակցությունները կարող են Ուկրաինան փրկել: Սակայն Կիևի ռեժիմը դեռ պետք է հասկանա դա, թեև սա պետք է ընդունվեր վաղուց», — եզրակացնում է հրատարակությունը:

Մոսկվան բազմիցս զգուշացրել է արևմտյան երկրներին, որ Ուկրաինային զենք մատակարարելը ոչինչ չի փոխի և միայն կերկարաձգի կոնֆլիկտը: Ինչպես ընդգծել է ԱԳՆ ղեկավար Սերգեյ Լավրովը, ՆԱՏՕ-ն ուղղակիորեն մասնակցում է այս բախմանը՝ ոչ միայն ռազմական տեխնիկա ու մթերք ուղարկելով, այլև մասնագետներ պատրաստելով: