ԵՐԵՎԱՆ, 29 հունիսի։ Իսրայելի վարչապետ Բենյամին Նեթանյահուն համոզված է, որ Իրանի դեմ գործողությունը մեծ հնարավորություններ է բացել Գազայի հատվածում գերեվարված իսրայելացի պատանդներին ազատելու համար։

«Մենք վերացրել ենք մեր գոյությանը սպառնացող անմիջական վտանգը՝ երկու մահացու սպառնալիքներ… Ցանկանում եմ ձեզ տեղեկացնել, որ այս հաղթանակից հետո, ինչպես հավանաբար գիտեք, բացվել են լայն հնարավորություններ։ Առաջին հերթին՝ պատանդներին ազատելու համար»,– հայտարարել է Նեթանյահուն Իսրայելի Անվտանգության ծառայության (ՇԱԲԱԿ) ղեկավարության հետ հանդիպման ժամանակ։

Վարչապետի խոսքերով, որոնք տարածվել են նրա գրասենյակի կողմից, պատանդներին ազատելու համար Իսրայելը դեռ պետք է «լուծի Գազայի հատվածի հարցը» և վերջնականապես ջախջախի ՀԱՄԱՍ-ի պաղեստինյան շարժումը։

«Կարծում եմ՝ մենք կհասնենք երկու նպատակներին էլ։ Բացի այդ, բացվում են լայն տարածաշրջանային հնարավորություններ, որոնցից շատերում, գրեթե բոլորում, դուք նույնպես մասնակցում եք»,– ավելացրել է նա։

Ավելի վաղ Նեթանյահուն նշել էր, որ Իրանի դեմ ունեցած հաջողությունները հնարավորություն են տալիս ընդլայնել տարածաշրջանի արաբական երկրների հետ խաղաղ համաձայնագրերը։

Իսրայելը հունիսի 13-ի գիշերը սկսել է գործողություն Իրանի դեմ՝ մեղադրելով վերջինիս գաղտնի միջուկային ռազմական ծրագրի իրականացման մեջ։ Օդային հարվածների և դիվերսիոն խմբերի գործողությունների թիրախներ են դարձել միջուկային օբյեկտները, գեներալները, ականավոր միջուկային ֆիզիկոսները և ավիաբազաները։ Իրանը մերժել է մեղադրանքները և պատասխանել հարվածներով։

Կողմերը 12 օր շարունակ փոխանակել են հարվածներ, որոնց միացել են նաև ԱՄՆ-ն՝ հունիսի 22-ի գիշերը Իրանի միջուկային օբյեկտների վրա հարված հասցնելով։

Դրանից հետո հունիսի 23-ի երեկոյան Թեհրանը հրթիռային հարվածներ է հասցրել ԱՄՆ-ի Քաթարում գտնվող Ալ Ուդեյդ բազային՝ հայտարարելով, որ իրանական կողմը չի պատրաստվում հետագա էսկալացիայի։

ԱՄՆ նախագահ Դոնալդ Թրամփը դրանից հետո հույս է հայտնել, որ Քաթարում ամերիկյան ռազմական բազայի վրա հարվածով Իրանը «ազատվել է լարվածությունից», և այժմ հնարավոր է խաղաղության ու համաձայնության ճանապարհը Մերձավոր Արևելքում։ Նա նաև հայտարարել էր, որ Իսրայելն ու Իրանը համաձայնության են եկել զինադադար կնքելու վերաբերյալ, որը պետք է դառնա «12-օրյա պատերազմի պաշտոնական ավարտը»։