ԹԲԻԼԻՍԻ, հունիսի 29. Վրաստանի նախկին նախագահ Սալոմե Զուրաբիշվիլին կրկին ելույթ է ունեցել Թբիլիսիի բողոքի ակցիայի ժամանակ և կոչ արել ընդդիմությանը՝ միավորվելու: Կիրակի օրը Վրաստանի մայրաքաղաքում ընդդիմադիր կուսակցությունները և նրանց կողմնակիցները բողոքի ցույց են անցկացնում: Ռուսթավելի պողոտան, որտեղ հավաքվել են բողոքողները, դեռ փակ է: Սակայն հավաքն այս պահին համեմատաբար փոքր է: Մասնակիցները պահանջում են ազատ արձակել ձերբակալված ակտիվիստներին և ընդդիմադիր կուսակցությունների ղեկավարներին: Զուրաբիշվիլին բազմիցս ելույթ է ունեցել ընդդիմությանը աջակցելու համար կազմակերպված հավաքներին: «Ես կլինեմ այնտեղ, որտեղ կա միասնություն: Եթե ինձ հարցնեք, թե ինչ նպատակներ ունեմ, ապա իմ միակ նպատակն է՝ փրկել երկիրը միասին… Նրանք (իշխանությունները) ոչինչ չեն կարող անել, եթե մենք միասին լինենք»,— հայտարարել է Զուրաբիշվիլին: Վրաստանում բողոքի ակցիաներ են ընթանում՝ պահանջելով նոր խորհրդարանական ընտրություններ անցկացնել: Դրանք սկսվել են այն բանից հետո, երբ 2024 թվականի նոյեմբերի 28-ին վարչապետ Իրակլի Քոբախիձեն հայտարարել է, որ մինչև 2028 թվականը կդադարեցնի Եվրամիությանը անդամակցելու հարցի քննարկումը: Հունիսին Վրաստանի ընդդիմադիր կուսակցությունների ղեկավարները ձերբակալվել են՝ մեղադրվելով նախկին նախագահ Միխեիլ Սաակաշվիլու կառավարման ժամանակ կատարված հանցագործությունների վերաբերյալ հանձնաժողովի նիստին չներկայանալու մեջ: Ձերբակալված ընդդիմադիրներից են Մամուկա Խազարաձեն, Բադրի Ջափարիձեն, Նիկա Մելիան, Նիկա Գվարամիան, Զուրաբ-Գիրչի Ջափարիձեն, Գիվի Թարգամաձեն, Գեորգի Վաշաձեն և պաշտպանության նախկին նախարար Իրակլի Օքրուաշվիլին՝ 7-8 ամսով: Ժամանակավոր խորհրդարանական հետաքննական հանձնաժողովը ստեղծվել է փետրվարի 5-ին: Այն պարբերաբար լսումներ է անցկացնում տարբեր գործերով: Վրաստանի ընդդիմադիրների մեծ մասը, որոնց հրավիրում են հանձնաժողովի նիստերին, հրաժարվում են մասնակցել: Հանձնաժողովի նիստին չներկայանալը քրեական հանցագործություն է և պատժվում է տուգանքով կամ մինչև մեկ տարվա ազատազրկմամբ: