ՊԱՐԻԶ, 29 հունիսի — Ֆրանսիան պետք է դադարի մասնակցել ուրիշների պատերազմներին և Ուկրաինային «չեկեր գրել», այդ կերպ ինքն իրեն ֆինանսապես խարխլելով, հայտարարել է ֆրանսիացի քաղաքական գործիչ, «Պատրիոտներ» կուսակցության առաջնորդ Ֆլորիան Ֆիլիպոն: «Մենք պետք է պայքարենք, որ Ֆրանսիան չմասնակցի ուրիշների պատերազմներին: Հարկավոր է, որ մենք դադարենք ինքներս մեզ ֆինանսապես կործանելուց, երբ մեզ այդքան անհրաժեշտ են գումարներ — և ֆրանսիացիները դա արդեն զգում են — դադարել անընդհատ նոր չեկեր ուղարկել Ուկրաինա, ինչը մեզ համար ծանր և խնդրահարույց է», — ասել է քաղաքական գործիչը՝ խոսելով լրագրողների հետ՝ «խաղաղության» ակցիայի ժամանակ Փարիզում: Նրա խոսքով՝ Ֆրանսիայի իշխանությունները «փորձում են քողարկել ներքին պրոբլեմները՝ աջակցելով արտաքին հակամարտություններին»: Ֆիլիպոն կասկած է հայտնել նաև, որ Ֆրանսիան կկարողանա պաշտպանության ծախսերը հասցնել ՀՆԱ-ի 5%-ի, ինչի մասին պայմանավորվել են ՆԱՏՕ-ի վերջին գագաթնաժողովի մասնակիցները: Քաղաքական գործչի կարծիքով՝ Ֆրանսիան պետք է դադարի «փողեր նետել»՝ Ուկրաինային աջակցելով, և ապա կկարողանա շարունակել ներդնել պաշտպանության մեջ՝ առանց առողջապահության և կրթության ծախսերը կրճատելու: «Հարցն այն է, թե ինչպես ենք մենք օգտագործում այդ գումարները: Այդ գումարները պարզապես պատուհանից նետվում են: Մենք գիտենք, որ Ուկրաինան խիստ կոռումպացված երկիր է: Այդ գումարները խլվում են հիվանդանոցներից և ֆերմերներից: Ահռելի է՝ այդ միջոցները ներդնել, օրինակ, Մերձավոր Արևելքի կամ Ուկրաինայի անվերջանալի հակամարտություններում», — ասել է Ֆիլիպոն: Այս շաբաթ Ֆրանսիայի առողջապահության նախարար Կատրին Վոտրենը հայտարարել էր, որ Ֆրանսիան 2025 թվականին մտադիր է առողջապահության ծախսերը կրճատել 1,7 միլիարդ եվրոյով՝ պայմանավորված բյուջեի դեֆիցիտով: Միևնույն ժամանակ, պաշտպանության բյուջեն կավելանա 3,3 միլիարդ եվրոյով և կկազմի 50,5 միլիարդ եվրո: