**Ավտովթար Սպիտակ-Երևան ճանապարհին. երկու վարորդներ վնասվածքներ են ստացել**

Հունիսի 27-ին Լոռու մարզում ավտովթար է տեղի ունեցել։ Ժամը 15:10-ի սահմաններում Սպիտակ-Երևան ավտոճանապարհի 2-րդ կմ հատվածում բախվել են երկու մեքենա։ Վթարի ենթարկվել են 51-ամյա Սերգեյ Մ․-ի վարած «Opel Zafira» և 43-ամյա Գարիկ Բ․-ի վարած «ՎԱԶ 2106» ավտոմեքենաները։ Բախման հետևանքով «ՎԱԶ 2106»-ը գլխիվայր շրջվել է։

«Վանաձոր» բժշկական կենտրոնի շտապօգնության բժիշկները դեպքի վայր ժամանել են ու վնասվածքներ ստացած վարորդներին տեղում առաջին օգնություն ցուցաբերել։ Սկզբում երկուսն էլ հրաժարվել են հիվանդանոց տեղափոխվելուց, սակայն ժամեր անց «ՎԱԶ 2106»-ի վարորդը բուժօգնություն ստանալու համար դիմել է բժշկական կենտրոն։

Դեպքի վայր են ժամանել նաև ՀՀ ՆԳ Նախարարության ՊԾ Լոռու մարզի գումարտակի աշխատակիցներ՝ գումարտակի հրամանատար Կարեն Կուրեղյանի և ծառայության ավագ տեսուչ Արման Սուքիասյանի գլխավորությամբ։ Տարածքում անվտանգությունն ապահովել են ավագ պարեկ Ռազմիկ Գրիգորյանը և կրտսեր պարեկ Վահրամ Մուրադյանը։

Փաստաթղթերը կազմվել են ՊԾ Լոռու մարզի գումարտակում և կարող են փոխանցվել ՀՀ Քննչական կոմիտեի Լոռու մարզային քննչական վարչություն՝ հետաքննության համար։

**Ծանուցում.**
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի օրինական ուժի մեջ մտած դատավճռով։