Եվրոպայում շարունակվող շոգի ալիքի հետևանքով մի շարք երկրներում ջերմաստիճանը գերազանցել է 40°C-ը։ Տեղի իշխանություններն անհրաժեշտ են համարել նախազգուշացումներ տարածել, քանի որ չոր եղանակը, ուժեղ քամին եւ տապը նպաստավոր պայմաններ են ստեղծում անտառային հրդեհների համար։

Ամռան բարձր ջերմաստիճանները Եվրոպայում շարունակվում են, իսկ մայրցամաքի տարբեր հատվածներում արձանագրվել են լայնածավալ անտառային հրդեհներ եւ ջերմային ծայրահեղ իրավիճակներ։

Թուրքիայում ջերմաստիճանը գերազանցել է 40 աստիճան Ցելսիուսը։ Իզմիրում, Բուրսայում, Թեքիրդաղում, Սաքարիայում եւ Ադանայում բռնկված անտառային հրդեհները զանգվածային արտակարգ իրավիճակներ են առաջացրել։

Հրդեհների վերացման համար շարժ են քաշվել ցամաքային եւ օդային հրշեջ ուժեր։ Ադանայում տեղի ունեցավ ողբերգական դեպք. հրդեհը մարելիս օդից ջուր վերցնելու փորձի ժամանակ կործանվել է հրշեջ ինքնաթիռ։ Այժմ տարածքում ընթանում են փրկարարական աշխատանքներ։

Հունաստանում բազմաթիվ աթենքցիներ լողափեր են մեկնել՝ փախչելով երկրում տիրող ամառային տոթից։

Կանխատեսումների համաձայն՝ շոգի ալիքը կշարունակվի մինչև ուրբաթ՝ ցամաքային հատվածներում հասնելով 40–41°C-ի եւ պահպանվելով ամբողջ հանգստյան օրերին։

Իսպանիայում եւ Պորտուգալիայում և՛ զբոսաշրջիկները, և՛ տեղի բնակիչները նախապատրաստվում են սպասվող շոգի ալիքին, քանի որ ջերմաստիճանները նույնպես կտրուկ կբարձրանան։ Պորտուգալիայում այն կարող է հասնել 44°C-ի։

Պորտուգալիայի օդերեւութաբանական ծառայությունը ամբողջ մայրցամաքային տարածքում դեղին մակարդակի նախազգուշացում է հրապարակել, իսկ ջերմաստիճանի հատկապես բարձր արժեքների վտանգի տակ գտնվող ներքին շրջաններում՝ նարնջագույն մակարդակի տագնապ։

Մադրիդի եւ Լիսաբոնի մայրաքաղաքներում զբոսաշրջիկները շոգից պաշտպանվելու համար հաճախում են ստվերոտ վայրեր եւ օգտվում սառը խմիչքներից։

Իշխանությունները հորդորում են քաղաքացիներին մնալ զգոն եւ խուսափել այնպիսի գործողություններից, որոնք կարող են նոր հրդեհներ հրահրել՝ ընդգծելով, որ չոր պայմաններն ու ուժեղ քամին խթանում են կրակի տարածումը։