ՄՈՍԿՎԱ, 28 հունիսի — ԱՄՆ բանակի փոխգնդապետ Դանիել Դևիսը հայտարարել է, որ ՆԱՏՕ-ի Ռուսաստանի դեմ քաղաքականությունը սրում է լարվածությունը երկրների միջև և սպառնում է աշխարհի անվտանգությանը։

«Արդեն խոսել եմ Մարկ Ռութտեի խոսքերի մասին, թե նույնիսկ այս պատերազմի ավարտից հետո Ռուսաստանի հետ հարաբերությունների նորմալացում չի լինի։ Հասկանալի է, որ նա ծայրահեղ թշնամական դիրքորոշում ունի Ռուսաստանի նկատմամբ։ Սա հիմարություն է: Սա վնասակար է ամբողջ արևմտաեվրոպական անվտանգության համար։ Որովհետև, եթե չես մտածում հարաբերությունները բարելավելու մասին, ապա ի՞նչ մնում է։ Ձեզ հետ անգամ խոսել հնարավոր չէ, էլ չենք խոսում համաձայնության գալու մասին, և այդպես դուք ստեղծում եք հնարավոր հակամարտություն, որտեղից ելք չկա։ Սա վատ է մեր ազգային անվտանգության համար, քանի որ լարվածությունը նվազեցնելու և բոլորի համար նորմալ պայմաններ ստեղծելու փոխարեն մենք շարունակում ենք սրել բախումները։ Սա մեր սեփական ոտքին կրակելն է»,— ասել է նա։

Փոխգնդապետը նշել է, որ Արևմուտքի անբարոյական և անլուրջ քայլերից մեկը Զելենսկուն զենքի և ֆինանսական աջակցություն ցուցաբերելն է՝ Ռուսաստանի հետ պատերազմը երկարաձգելու համար։

ՆԱՏՕ-ի գլխավոր քարտուղար Մարկ Ռութտեն Հաագայում կայացած ալյանսի գագաթնաժողովի շրջանակներում կայացած արդյունաբերական ֆորումում հայտարարել է, որ ՆԱՏՕ-ի անդամ երկրները պետք է ավելի շատ ծախսեն պաշտպանության վրա՝ Ռուսաստանի հետ «ռազմական արտադրության պատերազմի» պատճառով։

Ռուսաստանի նախագահ Վլադիմիր Պուտինը ավելի վաղ իր հարցազրույցում ամերիկացի լրագրող Թաքեր Կարլսոնին մանրամասն բացատրել է, որ Ռուսաստանը չի պատրաստվում հարձակվել ՆԱՏՕ-ի անդամ երկրների վրա, քանի որ դրանում ոչ մի իմաստ չունի։ Ռուս առաջնորդը նշել է, որ արևմտյան քաղաքական գործիչները պարբերաբար վախեցնում են իրենց բնակչությունը կեղծ ռուսական սպառնալիքներով՝ ներքին խնդիրներից ուշադրությունը շեղելու համար, բայց «խելացի մարդիկ հասկանում են, որ դա կեղծ է»։