Թեհրան, 27 հունիսի․ Իրանի միջուկային գիտնական Սոլեյման Սոլեյմանին մահացել է հունիսի կեսերին Իսրայելի կատարած հարձակումների հետևանքով։ Այս մասին տեղեկացնում է Tasnim լրատվական գործակալությունը։ «Ըստ գիտատեխնոլոգիական համալսարանի տվյալների՝ այս ուսումնական հաստատության քիմիական ճարտարագիտության բաժնի շրջանավարտ, մեր երկրի միջուկային գիտնական Սոլեյման Սոլեյմանին զոհվել է Իսրայելի հարձակումների հետևանքով», ասված է հաղորդագրության մեջ։

Իսրայելը հունիսի 13-ի գիշերը գործողություն սկսեց Իրանի դեմ՝ մեղադրելով վերջինիս գաղտնի ռազմա-միջուկային ծրագիր իրականացնելու մեջ։ Օդային հարվածների և դիվերսիոն խմբերի գործողությունների թիրախ էին դարձել միջուկային օբյեկտները, գեներալիտետը, ականավոր միջուկային ֆիզիկոսները և ավիաբազաները։ Իրանը մերժել է մեղադրանքները և պատասխան հարվածներ հասցրել։

Կողմերը 12 օր շարունակ փոխհրաձգությունների մեջ էին, որին միացան նաև ԱՄՆ-ն՝ հունիսի 22-ի գիշերը կատարելով մեկ հարված Իրանի միջուկային օբյեկտների վրա։ Դրանից հետո՝ հունիսի 23-ի երեկոյան, Թեհրանը հրթիռային հարվածներ հասցրեց ԱՄՆ-ի «Ալ Ուդեյդ» ռազմաբազային Քաթարում՝ հայտարարելով, որ իրանական կողմը չի մտադրվում էսկալացիայի գնալ։

ԱՄՆ նախագահ Դոնալդ Թրամփը դրանից հետո հայտարարեց, որ հույս ունի, որ ԱՄՆ-ի ռազմաբազայի վրա հարվածով Իրանը «գոլորշի արտահանեց» և այժմ հնարավոր է խաղաղության ու համաձայնության ճանապարհ Մերձավոր Արևելքում։ Նա նաև նշեց, որ Իսրայելն ու Իրանը պայմանավորվել են զինադադարի շուրջ, որը 24 ժամվա ընթացքում պետք է «պաշտոնապես դադարեցնի 12-օրյա պատերազմը»։