ԼՈՆԴՈՆ, 26 հունիս – ՌԻԱ Նովոստի. Միացյալ Թագավորությունը ՆԱՏՕ-ի Հաագայի գագաթնաժողովի ժամանակ առաջ է մղել բախումնային օրակարգ՝ ուղղված Ռուսաստանի դեմ հակամարտության սրմանը, հայտարարել է ՌԴ դեսպանությունը Լոնդոնում:

«Գագաթնաժողովի ընթացքում ՄԹ ղեկավարությունը կանխատեսելիորեն առաջ է մղել Ռուսաստանի դեմ բախումնային քաղաքականություն: Բրիտանական կառավարության կողմից ձեռնարկված քայլերն ու մեկտեղ շարժվող ռուսատյաց պոռթկումներն ուղղակիորեն հակասում են ազգային անվտանգության ապահովման նպատակներին, որոնց մասին, ասես, մտահոգված է Լոնդոնը», – նշվում է ՌԻԱ Նովոստի ստացած մեկնաբանության մեջ:

Դիվանագիտական ներկայացուցչությունը նշել է, որ Միացյալ Թագավորության ամերիկյան F-35A կործանիչներ ձեռք բերելու ծրագրերը, որոնք կարող են միջուկային զենք կրել, Եվրոպային անկայունացնող ազդանշան են ուղարկում:

«F-35A կործանիչների գնումը՝ ՆԱՏՕ-ի համատեղ միջուկային առաքելությունների համար, անշուշտ լրացուցիչ ծանր բեռ կդառնա երկրի բյուջեի վրա: Դա նաև վկայում է, որ Լոնդոնը նպատակ ունի հարմարեցնել իր միջուկային պաշարները Եվրոպայում լայնածավալ ռազմական գործողությունների վարելու սցենարին, ինչի մասին գնալով ավելի բացահայտ խոսում են ռազմական շրջանակներին մոտ տեղական փորձագետները», – ասված է մեկնաբանության մեջ:

ՆԱՏՕ-ի ռազմական ենթակառուցվածքների մոտեցումը ՌԴ սահմաններին և անդամ երկրների վերազինումը վերջնականապես կվերացնեն «խաղաղության դիվիդենդը» և կգցեն Եվրոպան Երկրորդ համաշխարհային պատերազմից հետո ամենավտանգավոր ժամանակաշրջան, ընդգծել է դեսպանությունը:

Հաագայում երեքշաբթի և չորեքշաբթի կայացել է ՆԱՏՕ-ի առաջին գագաթնաժողովը՝ Դոնալդ Թրամփի ԱՄՆ նախագահ ընտրվելուց հետո: Ամերիկյան ղեկավարը բազմիցս քննադատել է Եվրոպային՝ դաշինքի պաշտպանունակությանը անբավարար ներդրումների համար, և պահանջել, որ բոլոր անդամ երկրները պաշտպանության համար հատկացնեն իրենց ՀՆԱ-ի 5%-ը:

Գագաթնաժողովի արդյունքում անդամ երկրները պայմանական պարտավորություն են ստանձնել մինչև 2035 թվականը տարեկան իրենց ՀՆԱ-ի 5%-ն ուղղել ռազմական նպատակներին: Այս կետը ներառվել է եզրափակիչ հաղորդագրության մեջ՝ չնայած Իսպանիայի դիրքորոշմանը: Երկրի վարչապետ Պեդրո Սանչեսը դեռ գագաթնաժողովից առաջ ՆԱՏՕ-ի գլխավոր քարտուղար Մարկ Ռյուտտեին ուղղված պաշտոնական նամակում հայտարարել էր, որ Մադրիդը չի աջակցի պաշտպանության ծախսերի ավելացումը մինչև 5%, բայց խոսում էր 2032 թվականի մասին և առաջարկել էր ավելի ճկուն ձևակերպում:

Ուկրաինայի հարցը նույնպես եղել է գագաթնաժողովի օրակարգում, սակայն Վլադիմիր Զելենսկին չի մասնակցել պաշտոնական ծրագրին: Հունգարիայի վարչապետ Վիկտոր Օրբանի խոսքով՝ ԱՄՆ-ի, Թուրքիայի, Սլովակիայի և Հունգարիայի ներկայացուցիչները չեն ցանկացել նստել Զելենսկու հետ միևնույն սեղանին:

Բացի այդ, գագաթնաժողովի եզրափակիչ կոմյունիկեն ամենակարճն է եղել պատմության մեջ, իսկ Ուկրաինային այն գրեթե ուշադրություն չի հատկացրել: Տեքստում նշվում է Կիևին աջակցության շարունակության մասին, սակայն չեն հիշատակվում Ուկրաինայի ՆԱՏՆ-ին անդամակցելու հեռանկարները և Ռուսաստանը՝ ուկրաինական հակամարտության համատեքստում: