Շիրակի մարզի ոստիկանությունն ու քննչական մարմինները հայտնաբերել են «Mercedes» մակնիշի ավտոմեքենա, որը կապված է հունիսի 19-20-ին Գյումրիում տեղի ունեցած միջադեպի հետ:

Պարեկային ծառայության Շիրակի մարզի գումարտակի աշխատակիցները՝ հրամանատար Լևոն Մարտիրոսյանի և նրա տեղակալ Վանիկ Սաղոյանի գլխավորությամբ, գտել են տրանսպորտային միջոցը, որը տեղափոխվել էր ոստիկանության հատուկ պահվող տարածք:

Տվյալներով՝ միջադեպը տեղի է ունեցել Հաղթանակի պողոտայում գտնվող «Գյումրի» հացատան մոտ. վիճաբանությունն ու ծեծկռտուքն ուղեկցվել են կրակոցներով։ Մասնակիցների մի մասը հեռացել է դեպքի վայրից նշված մեքենայով։

Քրեական հետապնդման և նախաքննության շրջանակներում որոշ մանրամասներ դեռևս չեն հրապարակվում, սակայն իրավապահները արդեն ունեն ենթադրյալ կասկածյալների շրջանակ և պարզել են վեճի ու կրակոցների պատճառը:

Նախկինում հաղորդվել էր, որ միջադեպի հետևանքով մեկ մարդ վիրավորվել էր կրակոցից, երկուսը՝ ծեծկռտուքի ժամանակ։ Ոստիկանությունը ստուգել է տեղի բժշկական հաստատությունները և հաստատել, որ վիրավորներն բուժում են ստացել տանը:

Շիրակի մարզային քրեական վարչությունն արդեն փաստաթղթեր է կազմել, և նույնականացվել է կասկածյալի անձը, որը նախկինում ներգրավված է եղել քրեական այլ դեպքերում:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: