ՄՈՍԿՎԱ, 26 հունիսի — ԱՄՆ-ի ներգաղթի և մաքսային ծառայությունը (ICE) ձերբակալել է հազարավոր ապօրինի ներգաղթյալների միայն 6%-ին, ովքեր դատապարտվել են սպանության համար։ Դա հաղորդում է NBC հեռուստաալիքը` հղում անելով կառույցի ներքին տվյալներին:

«Սեպտեմբերին ICE-ը Կոնգրեսին տեղեկացրել էր, որ ազատության մեջ են մնում 13 հազարից ավելի ներգաղթյալներ, ովքեր մեղադրվում են սպանություններում: Այդ ժամանակից ի վեր ձերբակալվել է ընդամենը 752 մարդ»,- նշվում է հրապարակման մեջ:

Բացի այդ, ICE-ի աշխատակիցները ձերբակալել են 1693 մարդու` 15,8 հազար ներգաղթյալներից, ովքեր դատապարտվել են սեռական բնույթի հանցագործությունների համար: Սա կազմում է նրանց ընդհանուր թվի մոտ 11%-ը:

NBC-ի տվյալներով` 2024 թվականի հոկտեմբերի 1-ից մինչև 2025 թվականի մայիսի 31-ը ICE-ը ձերբակալել է 185 հազար ներգաղթյալ, որից 65 հազարը դատապարտվել էին տարբեր հանցագործությունների համար: Հիմնականում դրանք միգրացիոն օրենսդրության և երթևեկության կանոնների խախտումներ էին:

Հունվարի 20-ին, երդման արարողության օրը, Թրամփն իր առաջին ելույթում որպես ԱՄՆ-ի 47-րդ նախագահ խոստացել էր անմիջապես կանգնեցնել ապօրինի ներգաղթը դեպի Ամերիկա և սկսել միլիոնավոր միգրանտների արտահանձնման գործընթացը: Նա նաև արտակարգ դրություն է հաստատել երկրում` կապված ԱՄՆ հարավային սահմանի վիճակի հետ: