ՄՈՍԿՎԱ, հունիսի 26. ՆԱՏՕ-ի գլխավոր քարտուղար Մարկ Ռյուտտեի ընտրած ռազմավարությունը, որն ուղղված էր ԱՄՆ նախագահ Դոնալդ Թրամփի առաջ շողոքորթելուն և հաճոյանալուն, կարողացավ կանխել ամերիկացի առաջնորդի կողմից նոր սկանդալի առաջացումը: Այդ մասին գրում է գերմանական Der Spiegel ամսագիրը:

«Ռյուտտեի ստրկամիտ ու շողոքորթելու մոտեցումը շատերին թվաց խայտառակ, բայց այն արդյունք տվեց: Թրամփը խուսափեց նոր սկանդալ ստեղծելուց», – նշվում է հոդվածում:

Հրատարակությունը ենթադրում է, որ ՆԱՏՕ-ի գլխավոր քարտուղարն արել է ամեն ինչ, որպեսզի Հաագայում ամեն ինչ կենտրոնացած լինի Թրամփի զգացմունքների վրա, կարծես նրա առջև կարմիր գորգ են փռել, և երբեմն տեսարանները հասնում էին անհեթեթության:

«Ռյուտտեն ուսումնասիրել էր Թրամփի բոլոր սովորությունները՝ ինչպես օրինակելի ուսանող, որպեսզի հանձնի քննությունը՝ Թրամփի հետ անցկացրած օրը», – գրված է հոդվածում:

Ամսվա 25-ին ՆԱՏՕ-ի գագաթնաժողովում Ռյուտտեն Թրամփին «պապա» էր անվանել՝ խոսելով Իրանի ու Իսրայելի միջև հակամարտությունը լուծելու նրա ջանքերի մասին: Նախորդ օրը ԱՄՆ նախագահը հրապարակել էր ՆԱՏՕ-ի գլխավոր քարտուղարի ուղարկած հաղորդագրությունները, որտեղ վերջինս շնորհավորել էր ամերիկյան առաջնորդին Իրանում «որոշիչ» գործողությունների համար և նշել, որ Եվրոպան մեծ գումարներ կվճարի: ՆԱՏՕ-ն և հենց Ռյուտտեն հաստատել են Signal հաղորդագրությունների հավաստիությունը:

ՆԱՏՕ-ի գագաթնաժողովը տեղի է ունեցել երեքշաբթի ու չորեքշաբթի՝ Հաագայի կոնգրեսի շենքում: Բոլոր մասնակից երկրների ղեկավարները, ներառյալ ԱՄՆ-ն, հաստատել են Վաշինգտոնի պայմանագրի հինգերորդ հոդվածին հավատարմությունը, որը վերաբերում է կոլեկտիվ պաշտպանությանը: Դա նշված է գագաթնաժողովի եզրափակիչ փաստաթղթում: