«Բագրատ սրբազանի և 15 այլ ընդդիմադիրների դեմ կալանքի միջնորդությունները մեծ ծավալի ֆարս են ու քաղաքական հետապնդում»։ Այս մասին դատարանի բակում հայտարարեց Բագրատ Սրբազանի պաշտպան Սերգեյ Հարությունյանը։

Նրա խոսքով, իշխանությունը, անմեղության կանխավարկածը արհամարհելով, ձերբակալվածներին արդեն մեղադրում է արարքներում, որոնք նրանք չէին նախատեսում իրականացնել։

«Արդեն դատավճիռներ են կայացրել նույնիսկ դատավարությունից առաջ։ Նրանց ընտրած դատավորից էլ պարզ է, թե գործի ելքը ինչպիսին կլինի։ Կարծում եմ՝ դատավորին մեր բողոքարկումը կներկայացնենք», — ասաց Հարությունյանը։

Այսօր վաղ առավոտյան իրավապահները խուզարկություններ են իրականացրել «Սրբազան պայքար» շարժման աջակիցների տներում։ Նրանք նաև գործողություններ են կատարել Բագրատ արքեպիսկոպոս Գալստանյանի բնակարանում, ապա ձերբակալել Բագրատ Սրբազանին։

Բացի այդ, առավոտյան խուզարկություններ են կատարվել ՀՅԴ Հայաստանի Գերագույն մարմնի անդամ Իգոր Սարգսյանի, ՀՅԴ Աբովյանի կոմիտեի անդամ Վարդան Ավագյանի, Հրազդանի կոմիտեի անդամ Արտաշես Հունանյանի և Նոյեմբերյանի կոմիտեի անդամ Վարազդատ Ամիրաղյանի բնակարաններում։

Խուզարկել են նաև «Վերածնվող Հայաստան» կուսակցության ղեկավար Վահե Հակոբյանի տունը։ Նրա կնոջը ևս ձերբակալել են։

Քննչական կոմիտեն տարածել է հաղորդագրություն, որում նշվում է, որ «Սրբազան պայքար»-ի մասնակիցներն ու ղեկավարները պլանավորել են Հայաստանում ահաբեկչական գործողություններ։ Ըստ տվյալների՝ դրանում ներգրավվել են նաև նախկին ոստիկաններ և զինվորականներ։ ՔԿ-ն հրապարակել է նաև մի շարք ձայնագրություններ։