ՎԱՐՇԱՎԱ, 25 հունիս – Լեհաստանը հրավիրել է ՆԱՏՕ-ի բոլոր անդամ երկրներին ռազմական վարժանքներին, որոնք նախատեսում է անցկացնել ի պատասխան Ռուսաստանի և Բելառուսի «Արեւմուտք-2025» զորավարժությունների։ Այս մասին լրագրողներին հայտնել է երկրի նախագահ Անջեյ Դուդան։

Սեպտեմբերին Բելառուսի տարածքում կանցկացվեն ռուս-բելառուսական միացյալ զորավարժություններ։ Ինչպես մայիսի կեսերին նշել է ՌԴ պաշտպանության նախարար Անդրեյ Բելոուսովը, վարժանքները կունենան բացառապես պաշտպանական բնույթ։

«Մեր պատասխանն «Արեւմուտք» վարժանքներին Լեհաստանում ՆԱՏՕ-ի արեւելյան ճակատին զուգահեռ զորավարժությունների կազմակերպումն է: Այսօր խոսեցի փոխվարչապետ, ազգային պաշտպանության նախարար Վլադիսլավ Կոսինյակ-Կամիշի հետ… Նա տեղեկացրեց, որ հրավերներ են ուղարկվել ՆԱՏՕ-ի բոլոր անդամներին, և հետաքրքրությունը մեծ է», — ասել է Դուդան։

Նա նշել է, որ Լեհաստանում կանցկացվող զորավարժություններին կմասնակցեն ամերիկյան զինվորականներ. «Իհարկե, ամերիկացիները կլինեն։ Նրանք արդեն Լեհաստանում են»:

Իր խոսքով, ՆԱՏՕ-ի դաշնակիցների լայն մասնակցությունը այս զորավարժություններին բարձր հավանականություն ունի։

Նախկինում հայտնի էր, որ Բելառուսի ու Ռուսաստանի «Արեւմուտք-2025» վարժանքներին պետք է մասնակցեր ավելի քան 13 հազար զինծառայող։ Սակայն ավելի ուշ Բելառուսի պաշտպանության նախարար Վիկտոր Խրենինը հայտարարել էր, որ որոշում է ընդունվել «Արեւմուտք-2025»-ի մասշտաբները կրճատելու և հիմնական զորահավաքերը Բելառուսի արևմտյան սահմաններից խորացնելու մասին։

Հետագայում Բելառուսի պաշտպանության նախարարի օգնական Վալերի Ռևենկոն բացատրել էր, որ ռուս-բելառուսական զորավարժությունների մասնակիցների թիվը կնվազի մոտ երկու անգամ։