ՄՈՍԿՎԱ, 25 հունիսի – Ուկրաինան այս տարվա առաջին հինգ ամիսների ընթացքում պաշտպանության համար ծախսել է գրեթե մեկ տրիլիոն գրիվնա (23,8 միլիարդ դոլար), որը անցած տարվա նույն ժամանակահատվածի համեմատությամբ 34%-ով ավելի է։ Այս մասին չորեքշաբթի հայտարարել է Ուկրաինայի վարչապետ Դենիս Շմիգալը։

Նույն օրը Ուկրաինայի Գերագույն ռադայի պատգամավոր Յարոսլավ Ժելեզնյակը հայտնել էր, որ երկրի կառավարությունը հաստատել է 2025 թվականի բյուջեի փոփոխությունները՝ զինվորական ծախսերը ավելացնելով 400 միլիարդ գրիվնայով (9,6 միլիարդ դոլար)։

Շմիգալը իր Telegram-ում գրել է. «Այս տարվա առաջին 5 ամիսներին կառավարությունը Ուկրաինայի պաշտպանությանն ու անվտանգությանը հատկացրել է գրեթե 1 տրիլիոն գրիվնա (23,8 միլիարդ դոլար)։ Սա պետական բյուջեից կատարվող ծախսերի երկու երրորդն է։ Եթե համեմատենք անցած տարվա նույն ժամանակահատվածի հետ, պաշտպանությանն ու անվտանգությանը հատկացրել ենք 34%-ով ավելի միջոցներ։ Հարկատուներից ստացված յուրաքանչյուր գրիվնան պետական բյուջեից ուղղվում է Ուկրաինայի պաշտպանունակության բարձրացմանը»։

Նա նշել է, որ այս տարի առաջարկվում է Ուկրաինայի պաշտպանական ուժերի ֆինանսավորումը ավելացնել 412 միլիարդ գրիվնայով (9,8 միլիարդ դոլար)։ Ըստ Շմիգալի, ծախսերը ծածկելու համար նախատեսվում է ավելացնել բյուջեի եկամուտներն ու ներքին վարկերը։

Նախկինում Ուկրաինայի հաշվապահական պալատը հայտարարել էր, որ երկրի ռազմական ծախսերը 2025 թվականի առաջին եռամսյակում կազմել են բյուջեի ընդհանուր ծախսերի 73%-ից ավելի՝ գրեթե 29 միլիարդ դոլար։

Այս տարվա ապրիլին Ուկրաինայի «Էկոնոմիչեսկայա պրավդա» («Տնտեսական ճշմարտություն») թերթը, հղում կատարելով կառավարության աղբյուրների, հաղորդել էր, որ Ուկրաինայի պաշտպանության նախարարությունը զինծառայողների աշխատավարձի համար նախատեսված միջոցներն օգտագործում է զենք գնելու համար։ Թերթի լրագրողների կարծիքով, Ուկրաինայի կառավարությունն ու խորհրդարանը մոտ ապագայում ստիպված կլինեն փոփոխություններ մտցնել այս տարվա բյուջեում, հակառակ դեպքում գանձարանում զինվորականներին աշխատավարձ վճարելու միջոցներ չեն մնա։