ՄՈՍԿՎԱ, 25 հունիս – Իսրայելի պաշտպանության բանակը (ԾԱՀԱԼ) հայտնել է, որ երկրի ռազմաօդային ուժերը կարողացել են խափանել երկու անօդաչու թռչող սարքերի թռիչքը, որոնք, հավանաբար, գալիս էին Իրանի կողմից: «Ավելի վաղ այս երեկո Իսրայելի ռազմաօդային ուժերը կանգնեցրել են երկու ԱԹՍ-ներ, որոնք մոտենում էին Իսրայելի տարածքին, ամենայն հավանականությամբ՝ Իրանից: Այդ գործողությունները տեղի են ունեցել Իսրայելի տարածքից դուրս»,- նշված է ԾԱՀԱԼ-ի մամուլի ծառայության հաղորդագրության մեջ:

Իսրայելը հունիսի 13-ի գիշերը սկսել է գործողություն Իրանի դեմ, մեղադրելով վերջինիս գաղտնի ռազմամիջուկային ծրագրի իրականացման մեջ: Օդային հարձակումների և դիվերսիոն խմբերի գործողությունների թիրախ են դարձել ատոմային օբյեկտները, բարձրաստիճան զինվորականները, անվանի միջուկային ֆիզիկոսները և օդանավակայանները: Իրանը մերժել է այդ մեղադրանքները և պատասխանել է սեփական հարվածներով:

Կողմերը 12 օր շարունակ փոխանակել են հարվածներ, որին միացել են նաև ԱՄՆ-ն՝ հունիսի 22-ի գիշերը կատարելով մեկ հարված Իրանի միջուկային օբյեկտների վրա: Դրանից հետո, հունիսի 23-ի երեկոյան Թեհրանը հրթիռային հարված է հասցրել ԱՄՆ-ի «Էլ Ուդեյդ» ռազմակայանին՝ հայտարարելով, որ իրենք չեն պատրաստվում էլ ավելի սրել լարվածությունը:

ԱՄՆ նախագահ Դոնալդ Թրամպը դրանից հետո արտահայտել է հույս, որ ԱՄՆ-ի ռազմակայանի վրա հարվածով Իրանը «արտահայտել է իր դժգոհությունը», և այժմ հնարավոր է խաղաղության ճանապարհը Մերձավոր Արևելքում: Նա նաև նշել է, որ Իսրայելն ու Իրանը համաձայնեցին զինադադար կնքել, որը 24 ժամ հետո պետք է դառնար «12-օրյա պատերազմի պաշտոնական ավարտ»: Սակայն դրանից հետո կողմերը մեղադրել են միմյանց զինադադարի խախտման մեջ և սպառնացել են պատասխան հարվածներով: