ՎԱՇԻՆԳՏՈՆ, 24 հունիսի – Ամերիկայի Միացյալ Նահանգների հարվածները Իրանի երեք միջուկային օբյեկտներին չեն ոչնչացրել երկրի միջուկային ծրագրի հիմնական բաղադրիչները: Ամերիկյան հետախուզության նախնական գնահատմամբ, այս հարվածները ետ են մղել ծրագրի զարգացումը ընդամենը մի քանի ամսով: Այս մասին երեքշաբթի օրը հայտնում է CNN հեռուստաալիքը՝ հղում անելով ԱՄՆ-ի պաշտպանության նախարարության հետախուզական վարչության զեկույցին:

Հեռուստաալիքի երեք աղբյուրների տվյալներով՝ միջուկային նյութերն ու սարքավորումները, այդ թվում՝ հարստացված ուրանի պաշարները և ցենտրիֆուգները, հիմնականում մնացել են անվնաս: Հիմնականում վնասվել են Ֆորդոյում, Նատանզում և Իսֆահանում գտնվող օբյեկտների վերգետնյա կառույցներն ու էներգետիկ ենթակառուցվածքը: Ամերիկյան զինված ուժերը հայտարարել են, որ գործողությունն անցել է ըստ պլանի, սակայն վերլուծաբանները նշում են, որ ծրագրի հիմնական տարրերը ոչնչացված չեն:

Սպիտակ տունը հայտարարել է, որ չի համաձայն հետախուզության զեկույցի հետ, այն անվանելով «սխալ» և ընդգծելով, որ հարվածները «լիովին հաջողված են եղել»: ԱՄՆ-ի նախագահ Դոնալդ Թրամփն ավելի վաղ անձամբ հայտարարել էր, որ «օբյեկտները լիովին ոչնչացվել են», սակայն, ըստ CNN-ի տեղեկությունների, միջուկային օբյեկտները պահպանել են իրենց ներուժի մեծ մասը: Վնասի գնահատումը շարունակվում է, և, ինչպես նշում է հեռուստաալիքը, եզրակացությունները կարող են փոխվել նոր տեղեկատվության ստացման հետ մեկտեղ: