ՏԵՀՐԱՆ, հունիսի 24. Իրանի նախագահ Մասուդ Փեզեշկյանը երեկ հեռախոսազրույցի ժամանակ Սաուդյան Արաբիայի ժառանգորդ արքայազն Մուհամմեդ բին Սալմանին հայտնել է, որ Թեհրանը պատրաստ է լուծել ԱՄՆ-ի հետ ունեցած խնդիրները «միջազգային շրջանակներում»:

«Մենք պատրաստ ենք լուծել Իրանի և ԱՄՆ-ի միջև առկա հարցերը միջազգային շրջանակներում և երբեք չենք պահանջի այն, ինչը դուրս է մեր իրավունքների սահմաններից: Այս առումով մենք դիմավորում ենք ցանկացած օգնություն մեր բարեկամ և եղբայրական երկրների կողմից»,— ասել է Փեզեշկյանը: Նրա խոսքերը հրապարակվել են Իրանի նախագահի մամուլի ծառայության կայքում:

Իր հերթին, Սաուդյան Արաբիայի արքայազնը հույս է հայտնել, որ Իրանի և ԱՄՆ-ի միջև բանակցությունները կսկսվեն հնարավորինս շուտ և կհանգեցնեն այնպիսի արդյունքների, որոնք կհանգստացնեն երկու կողմերին: Բին Սալմանը նաև արտահայտել է հույս, որ չեն լինի որևէ միջադեպեր, որոնք կարող են հանգեցնել Իսրայելի և Իրանի միջև նոր բախումների:

Հիշեցնենք, որ Իսրայելը հունիսի 13-ի գիշերը ռազմական գործողություն է սկսել Իրանի դեմ՝ մեղադրելով վերջինիս գաղտնի միջուկային ծրագրի իրականացման մեջ: Օդային հարվածների և դիվերսիոն խմբերի գործողությունների թիրախ են դարձել միջուկային օբյեկտները, ռազմական հրամանատարությունը, առաջատար միջուկային ֆիզիկոսները և ավիաբազաները: Իրանը մերժել է մեղադրանքները և պատասխանել է հարվածներով:

Կողմերը 12 օր շարունակ փոխհրաձգություններ են իրականացրել, որին միացել է նաև ԱՄՆ-ը՝ հունիսի 22-ի գիշերը Իրանի միջուկային օբյեկտների դեմ հարված հասցնելով:

Սրան ի պատասխան՝ Իրանը հունիսի 23-ի երեկոյան հրթիռային հարված է հասցրել ԱՄՆ-ի ռազմական բազային Կատարում՝ հայտարարելով, որ չի պատրաստվում հետագա էսկալացիայի գնալ:

ԱՄՆ նախագահ Դոնալդ Թրամփը դրանից հետո հայտարարել է, որ հույս ունի, թե Կատարում ամերիկյան ռազմաբազայի վրա հարվածով Իրանը «արտահայտել է իր դժգոհությունը», և այժմ հնարավոր է խաղաղության ճանապարհը Մերձավոր Արևելքում: Նա նաև ասել է, որ Իսրայելն ու Իրանը համաձայնել են զինադադար կնքել, որը 24 ժամ հետո պետք է դառնա «12-օրյա պատերազմի պաշտոնական ավարտը»: