ԲԵՆՂԱԶԻ, 24 հունիսի։ Իրանը վերջ դրեց Իսրայելի «Երկաթե գմբեթ» հակահրթիռային համակարգի անխոցելիության մասին տեսությանը։ Այդ մասին հայտարարել է լիբիական ռազմական և անվտանգության փորձագետ Ադել Աբդել Քաֆին՝ զրուցելով լրատվական գործակալության հետ։

«Դա շփոթեցրեց և խանգարեց Իսրայելի հակաօդային պաշտպանության ուժերին, ինչի արդյունքում իրանական ճշգրիտ հարվածներն ավարտեցին «Երկաթե գմբեթի» պատմությունը և մեծ խառնաշփոթ առաջացրին իսրայելական գործող համակարգերում»,– նշել է Քաֆին։

Նա նշել է, որ Իրանը կարողացել է զարգացնել իր հարձակողական հնարավորությունները, հատկապես հրթիռների ճշգրտությունն ու պաշտպանական համակարգերը շրջանցելու ունակությունը, որոնք մշակվել են Իսրայելի և ԱՄՆ-ի կողմից։

«Իրանի կիրառած բարդ հարձակողական մարտավարությունը նաև բացահայտեց Իսրայելի պաշտպանական համակարգի լուրջ թերությունները»,– կարծում է փորձագետը։

Իսրայելը հունիսի 13-ի գիշերը սկսեց ռազմական գործողություն Իրանի դեմ՝ մեղադրելով վերջինիս գաղտնի ռազմա-միջուկային ծրագրի իրականացման մեջ։ Օդային հարվածների և դիվերսիոն խմբերի գործողությունների թիրախ դարձան միջուկային օբյեկտները, զինվորական ղեկավարությունը, ականավոր միջուկային ֆիզիկոսները և ավիաբազաները։

Իրանը մերժել է մեղադրանքները և պատասխանել հարձակումներով։ Կողմերը 12 օր շարունակ փոխհրաձգություններ էին վարում, որին միացան նաև ԱՄՆ-ն՝ հունիսի 22-ի գիշերը հարված հասցնելով Իրանի միջուկային օբյեկտներին։

Դրան ի պատասխան՝ Թեհրանը հունիսի 23-ի երեկոյան հրթիռային հարվածներ հասցրեց ԱՄՆ-ի Էլ-Ուդեյդ բազային Կատարում՝ հայտարարելով, որ իրանական կողմը չի պատրաստվում հետագա էսկալացիայի։

ԱՄՆ նախագահ Դոնալդ Թրամփը դրանից հետո հույս է հայտնել, որ ԱՄՆ-ի ռազմական բազայի վրա հարվածով Իրանը «ազատվել է լարվածությունից», և այժմ հնարավոր է խաղաղության ճանապարհը Մերձավոր Արևելքում։

Նա նաև հայտարարել է, որ Իսրայելն ու Իրանը պայմանավորվել են զինադադար կնքել, որը 24 ժամվա ընթացքում պետք է դառնա «12-օրյա պատերազմի պաշտոնական ավարտը»։