ՍԵՈՒԼ, հունիսի 24. ՌԻԱ Նովոստի. Ռուսաստանը կարող է միջնորդ դառնալ Հյուսիսային և Հարավային Կորեաների միջև կապի վերականգնման և եռակողմ համագործակցության զարգացման գործում, այդ կարծիքին է Հյուսիսային Կորեայի ուսումնասիրությունների համալսարանի պրոֆեսոր Յան Մու Ջինը: Ավելի վաղ հաղորդվել էր, որ Հյուսիսային Կորեայում հունիսի 21-23-ին տեղի է ունեցել Կորեայի աշխատավորական կուսակցության Կենտկոմի XII պլենումի ընդլայնված նիստը, որտեղ որոշում է կայացվել կուսակցության IX համագումարի հրավիրման մասին, ամփոփվել են առաջին կիսամյակի արդյունքները և նշվել ներքին քաղաքականության ու տնտեսության հիմնական ուղղությունները:

ՌԻԱ Նովոստիին տված մեկնաբանությունում Յան Մու Ջինը նշել է, որ Պխենյանը հնարավոր է մասնակցի Սեպտեմբերի 3-6-ը Վլադիվոստոկում կայանալիք Արևելյան տնտեսական ֆորումին, և դա կարող է հնարավորություն դառնալ Սեուլի և Հյուսիսային Կորեայի միջև երկխոսության համար: «Մեծ հավանականություն կա, որ Հյուսիսային Կորեան ֆորում կուղարկի բարձրաստիճան պատվիրակություն: Եթե Ռուսաստանը օգտագործվի որպես միջնորդ, դա կարող է հանգեցնել հարավկորեա-ռուսական և միջկորեական հարաբերությունների վերականգնմանը, ինչպես նաև եռակողմ համագործակցության վերականգնմանը, ներառյալ Հյուսիսային ծովային ուղու զարգացումը»,— նշել է փորձագետը:

Յան Մու Ջինը նաև ընդգծել է, որ «Հյուսիս-Հարավ-Ռուսաստան» ձևաչափի վերականգնումը կարող է նոր թափ հաղորդել Հարավային Կորեայի նախագահ Լի Ջե Մյոնգի դիվանագիտական նախաձեռնությունների իրականացմանը: «Եթե Հյուսիսի, Հարավի և Ռուսաստանի միջև եռակողմ համագործակցությունը վերականգնվի, դա կօգնի իրականացնել նախագահ Լի Ջե Մյոնգի ընտրարշավի խոստումը՝ հասնել միջուկային զենքից զերծ խաղաղությանը և վերականգնել վեցակողմ բանակցությունները Հյուսիս-Արևելյան Ասիայում կայունություն ապահովելու համար»,— ավելացրել է փորձագետը:

Միևնույն ժամանակ, փորձագետը նշել է, որ հյուսիսկորեական ԶԼՄ-ների հաղորդագրություններում պլենումի ընդլայնված նիստի մասին չկան միջուկային զենքի, հակաիմպերիալիզմի հիշատակումներ, և դիտվում է «հռետորական մակարդակի վերահսկում»: «Ըստ երևույթին, շեշտադրումը պաշտպանությունից տեղափոխվել է տնտեսական շինարարության վրա, հնարավոր է ԿԱԿ-ի IX համագումարում անցում «տնտեսական կուրսի», ինչը բացում է երկխոսության հնարավորություն ԱՄՆ-ի, Ճապոնիայի և Հարավային Կորեայի հետ»,— ամփոփել է Յան Մու Ջինը: