ՄՈՍԿՎԱ, հունիսի 24. Իսրայելի պաշտպանության բանակը (ԾԱՀԱԼ) հաղորդել է, որ երեքշաբթի օրը Իրանից հրթիռների հինգերորդ արձակումն է գրանցվել։

Ավելի վաղ՝ երեքշաբթի օրը, ԾԱՀԱԼ-ը չորս անգամ տեղեկացրել էր Իրանի կողմից հրթիռների արձակման մասին։

«Որոշ ժամանակ առաջ Իսրայելի պաշտպանության բանակը հայտնաբերել է Իրանից Իսրայելի ուղղությամբ արձակված հրթիռներ։ Պաշտպանական համակարգերը աշխատում են սպառնալիքը կանխելու համար», — ասված է բանակի հաղորդագրության մեջ։

Հունիսի 24-ի գիշերը ԱՄՆ նախագահ Դոնալդ Թրամփը հայտարարել էր, որ Իսրայելն ու Իրանը պայմանավորվել են հրադադար կնքելու մասին, որը 24 ժամ հետո պետք է «պաշտոնապես դադարեցնի 12-օրյա պատերազմը»։

Միևնույն ժամանակ, ամերիկյան թերթը հաղորդել էր, որ Իսրայելի ռազմական անանուն աղբյուրը հրաժարվել է մեկնաբանել Թրամփի` Իրանի հետ հրադադարի մասին արած հայտարարությունը։

Իրանի արտաքին գործերի նախարար Աբաս Արակչին մոտավորապես ժամը 4:00-ին (Մոսկվայի ժամանակով) հայտարարել էր, որ ներկայումս հրադադարի կամ ռազմական գործողությունների դադարեցման ոչ մի պայմանագիր չկա, բայց եթե Իսրայելը դադարեցնի «ագրեսիան» տեղական ժամանակով առավելագույնը մինչև ժամը 4:00-ը (Մոսկվայի ժամանակով 3:30), Թեհրանն այլևս հարվածներ չի հասցնի։