ՓԱՐԻԶ, հունիսի 24. Իրանի իրավիճակը ցույց է տալիս, որ Եվրոպական Միության և ԱՄՆ-ի միջև փոխըմբռնում չկա։ Այդ մասին ՌԻԱ Նովոստին հայտնել է Եվրոպական խորհրդարանի ֆրանսիացի պատգամավոր Թիերի Մարիանին։ Նրա կարծիքով՝ ՆԱՏՕ-ի գալիք գագաթաժողովը կխորացնի ԱՄՆ նախագահ Դոնալդ Թրամփի և Բրյուսելի միջև առկա տարաձայնությունները։

«Եթե Թրամփը հետևողական լինի, նա կրկին կպահանջի ԵՄ-ից ավելի մեծ ռազմական ծախսեր, այլ կերպ ասած՝ ավելի շատ ամերիկյան զենք գնել։ Բայց այսօր խնդիրն այն է, որ ԱՄՆ-ի և ԵՄ-ի միջև փոխըմբռնում չկա։ Ամենալավ օրինակն այն է, ինչ կատարվում է Իրանում. այն պահին, երբ Թրամփը որոշում է ռմբակոծել այն, Եվրոպան պնդում է բանակցությունների շարունակության վրա»,— ասել է Մարիանին։

Նախորդ օրը ԱՄՆ-ի Սպիտակ տան մամուլի քարտուղար Քերոլայն Լևիթը հայտնել էր, որ Դոնալդ Թրամփը ՆԱՏՕ-ի գագաթաժողով կմեկնի մեկ օր ուշ՝ երկուշաբթի օրը, այլ ոչ թե երկուշաբթի առավոտյան, ինչպես նախատեսված էր։ Նրա խոսքով՝ քննարկման հիմնական թեմաներից մեկը ՆԱՏՕ-ի անդամ երկրների պաշտպանության ծախսերի 5%-ի շեմն է։

Ավելի վաղ ՆԱՏՕ-ի գլխավոր քարտուղար Մարկ Ռյուտտեն հայտարարել էր, որ բոլոր անդամ երկրները կողմ են բանակցություններին Իրանի հետ։ Ֆրանսիայի նախագահ Էմանուել Մակրոնը շեշտել էր, որ ԱՄՆ-ի հարվածները Իրանին «անօրինական են» և կոչ էր արել երկխոսության։ Ֆրանսիայի արտաքին գործերի նախարար Ժան-Նոել Բառոն, իր հերթին, նշել էր, որ ԱՄՆ-ը Ֆրանսիային չէր տեղեկացրել Իրանի միջուկային օբյեկտներին հարվածելու մտադրության մասին։

ԱՄՆ-ը հունիսի 22-ի գիշերը հարվածներ էր հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում։ Վաշինգտոնի խոսքով՝ այդ հարվածները նախատեսված էին Իրանի միջուկային ծրագիրը ոչնչացնելու կամ զգալիորեն թուլացնելու համար։

ԱՄՆ նախագահ Դոնալդ Թրամփը հայտարարել էր, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում։ Միևնույն ժամանակ, ԱՄՆ փոխնախագահ Ջեյ Դի Վենսը, Իրանում «վանդալական ու հանցագործ» անվանված հարվածներից հետո, ասել էր, որ ԱՄՆ-ը պատերազմի մեջ չէ Իսլամական Հանրապետության դեմ։

Իրանի արտաքին գործերի նախարար Աբբաս Արակչին հայտարարել էր, որ դիվանագիտության դուռը միշտ պետք է բաց լինի, սակայն «այս դեպքը այդպիսին չէ»։ Նրա խոսքով՝ հենց ԱՄՆ-ն է դավաճանել դիվանագիտությանը։ Իրանը կձեռնարկի բոլոր միջոցները՝ իր անվտանգությունն ու երկրի շահերը պաշտպանելու համար։

Իրանի ատոմային էներգիայի կազմակերպությունը հայտարարել էր, որ երկրի միջուկային արդյունաբերության զարգացումը չի կանգնի։

ԱՄՆ-ի հարվածները բացասական արձագանք են առաջացրել միջազգային ասպարեզում։ ՄԱԿ-ի գլխավոր քարտուղար Անտոնիու Գուտեռեշը դրանք անվանել է վտանգավոր էսկալացիա տարածաշրջանում և ուղղակի սպառնալիք միջազգային խաղաղությանն ու անվտանգությանը։

Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ դրանք համարելով միջազգային իրավունքի, ՄԱԿ-ի Կանոնադրության և Անվտանգության Խորհրդի բանաձևերի կոպիտ խախտում։ Մոսկվան ՄԱԳԱՏԷ-ից ակնկալում է անկողմնակալ արձագանք։

ԱՄՆ-ի գործողությունները դատապարտել են նաև Կուբան ու Չինաստանը։

ՆԱՏՕ-ի գագաթաժողովը տեղի կունենա Հաագայում հունիսի 24-25-ին։