ՏԵՀԵՐԱՆ, 23 հունիսի – Իրանական պետական հեռուստառադիոընկերությունը (IRIB) հայտնում է, որ Իրանի առնվազն վեց հրթիռներ հարվածել են ԱՄՆ-ի ռազմակայանին Կատարում։ Ավելի վաղ իրանական լրատվամիջոցները հաղորդել էին, որ Թեհրանը ռազմական գործողություն է սկսել ԱՄՆ-ի ռազմակայանների դեմ Կատարում և Իրաքում։ Այս գործողությունը կոչվում է «Բարի լուր հաղթանակի մասին»։

IRIB-ի հաղորդմամբ՝ «այս պահին գրանցված է առնվազն վեց հրթիռային հարված Կատարի Ալ Ուդեյդ ռազմակայանի վրա»։ Կատարի պաշտպանության նախարարությունը երկուշաբթի հայտարարել է, որ երկրի հակաօդային պաշտպանությունը հաջողությամբ կանխել է Իրանի հրթիռային հարվածը, զոհեր կամ վիրավորներ չկան։

ԱՄՆ-ն հունիսի 22-ի գիշերը հարվածներ է հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում։ Վաշինգտոնի խոսքով՝ այս հարվածները նախատեսված էին Իրանի միջուկային ծրագիրը ոչնչացնելու կամ զգալիորեն թուլացնելու համար։

Այս ֆոնին Իրանի խորհրդարանը եզրակացրել է, որ անհրաժեշտ է փակել Հորմուզի նեղուցը։ Վերջնական որոշումը պետք է հաստատի երկրի ազգային անվտանգության խորհուրդը։

ԱՄՆ-ի նախագահ Դոնալդ Թրամփը հայտարարել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին սպասվում են ավելի լուրջ հետևանքներ։ Միևնույն ժամանակ, ԱՄՆ-ի փոխնախագահ Ջեյ Դի Վենսը, Իրանի կողմից «վայրագ և հանցագործ» անվանված հարվածներից հետո, ասել է, որ ԱՄՆ-ը պատերազմի մեջ չէ Իրանի հետ։

Իրանի արտաքին գործերի նախարար Աբբաս Արակչին հայտարարել է, որ դիվանագիտության դուռը միշտ պետք է բաց լինի, սակայն «այս դեպքը այդպիսին չէ»։ Նրա խոսքով՝ հենց ԱՄՆ-ն է դավաճանել դիվանագիտությանը։ Իրանը կձեռնարկի բոլոր միջոցները՝ պաշտպանելու երկրի անվտանգությունն ու շահերը։

Իրանի ատոմային էներգիայի կազմակերպությունը հայտարարել է, որ Իրանի միջուկային արդյունաբերության զարգացումը չի կանգնի։

ԱՄՆ-ի հարվածները բացասական արձագանք են առաջացրել միջազգային ասպարեզում։ ՄԱԿ-ի գլխավոր քարտուղար Անտոնիու Գուտեռեշը դրանք անվանել է վտանգավոր էսկալացիա տարածաշրջանում և ուղղակի սպառնալիք միջազգային խաղաղությանն ու անվտանգությանը։

Ռուսաստանը կտրականապես դատապարտել է ԱՄՆ-ի հարվածները Իրանի միջուկային օբյեկտներին՝ դրանք համարելով միջազգային իրավունքի, ՄԱԿ-ի կանոնադրության և Անվտանգության խորհրդի բանաձևերի կոպիտ խախտում։ Մոսկվան ՄԱԿԱՏՕ-ից սպասում է անաչառ արձագանքի։