Ամերիկացի լրագրողն ասում է. Իրանը կարող է փակել Օրմուզի նեղուցը, եթե ցանկանա

Ամերիկացի լրագրող Ջեքսոն Հինկլը X սոցիալական ցանցում հրապարակել է գրառում, որտեղ նշել է, որ Իրանն ունի բոլոր հնարավորություններն ու հիմքերը՝ Օրմուզի նեղուցը փակելու համար:

«Իրանը կփակի Օրմուզի նեղուցը, եթե ուզի՛։ Երբեք մի՛ մոռանաք, որ ԱՄՆ-ն ու Իսրայելն են սկսել սա»,- գրել է լրագրողը:

Իրանի խորհրդարանի անդամ Իսմայիլ Կուսարին կիրակի օրը հայտարարել է, որ խորհրդարանը համարում է նեղուցի փակումը անհրաժեշտ, սակայն վերջնական որոշումը պետք է հաստատի Ազգային անվտանգության խորհուրդը:

Իսրայելը հունիսի 13-ի գիշերը ռազմական գործողություն է սկսել Իրանի դեմ՝ այն մեղադրելով գաղտնի միջուկային ծրագրի մեջ։ Ռմբակոծությունների և դիվերսիոն խմբերի գործողությունների թիրախ են դարձել միջուկային օբյեկտները, զինվորական ղեկավարությունը, միջուկային ֆիզիկոսները, օդային բազաները, հակաօդային պաշտպանությունը և «գետնա-գետին» հրթիռները։

ԱՄՆ-ն հունիսի 22-ի գիշերը հարվածներ է հասցրել Իրանի երեք միջուկային օբյեկտներին՝ Նաթանզում, Ֆորդոյում և Իսֆահանում։ Վաշինգտոնի խոսքով՝ հարձակումը նախատեսված էր Իրանի միջուկային ծրագիրը ոչնչացնելու կամ զգալիորեն թուլացնելու համար։

Ամերիկայի նախկին նախագահ Դոնալդ Թրամփը նշել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում։ Միևնույն ժամանակ, ԱՄՆ փոխնախագահ Ջեյ Դի Վենսը՝ ի պատասխան Իրանի կոչերի, որ ամերիկյան հարվածները «վայրագ և հանցագործ» են եղել, ասել է, որ ԱՄՆ-ն պատերազմի մեջ չէ Իրանի հետ։

Իրանի արտաքին գործերի նախարար Աբբաս Արակչին նշել է, որ դիվանագիտության դուռը միշտ պետք է բաց լինի, սակայն «այս պարագայում այն այդպիսին չէ»։ Նրա խոսքով՝ հենց ԱՄՆ-ն է «դավաճանել դիվանագիտությանը»։ Իրանը կանի ամեն ինչ՝ պաշտպանելու իր անվտանգությունն ու պետական շահերը։

Իրանի Ատոմային էներգիայի կազմակերպությունը հայտարարել է, որ երկրի միջուկային արդյունաբերության զարգացումը չի դադարեցվի։

ԱՄՆ-ի հարձակումը բացասական արձագանք է առաջացրել միջազգային ասպարեզում։