ՏԵՀՐԱՆ, 23 հունիսի – Իրանի զինված ուժերի համակարգող «Խաթամ ալ-Անբիա» շտաբը հայտարարել է, որ ԱՄՆ-ի հարվածների պատասխանում Իրանի ռազմականները կիրականացնեն գործողություններ, որոնք ծանր հետևանքներ կունենան ամերիկյան կողմի համար: «Այս հանցագործության պատասխանում հզոր ու ուղղորդված գործողությունների ժամանակ դուք կբախվեք ձեր պատկերացումներից դուրս եկող ծանր հետևանքների, որոնք ձեզ կստիպեն զղջալ», — գրում է IRNA գործակալությունը՝ վկայակոչելով շտաբի հաղորդագրությունը: Շտաբը նաև նշել է, որ ԱՄՆ-ն պատերազմ է սկսել Իրանի դեմ:

ԱՄՆ-ն հունիսի 21-ի գիշերը հարվածներ է հասցրել Իրանի ատոմային օբյեկտներին Նետանզում, Ֆորդոյում և Իսֆահանում: Վաշինգտոնի պնդմամբ, հարձակումը նախատեսված էր կասեցնել կամ զգալի թուլացնել Իրանի միջուկային ծրագիրը: Ամերիկայի նախագահ Դոնալդ Թրամփը հայտարարել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում:

Սակայն ԱՄՆ փոխնախագահ Ջեյ Դի Վանսը, Իրանի կողմից «վայրագ ու հանցագործ» անվանված հարվածներից հետո, ասել է, որ ԱՄՆ-ն պատերազմում չէ Իսլամական Հանրապետության հետ:

Իրանի արտաքին գործերի նախարար Աբաս Արակչին հայտարարել է, որ «դիվանագիտության դուռը միշտ պետք է բաց լինի, բայց հիմա… դա այդ դեպքը չէ»: Նրա խոսքով, հենց ԱՄՆ-ն է դավաճանել դիվանագիտությանը: Իրանը կձեռնարկի բոլոր միջոցները՝ իր անվտանգությունն ու երկրի շահերը պաշտպանելու համար:

Իրանի ատոմային էներգիայի կազմակերպությունը հայտարարել է, որ երկրի միջուկային զարգացումը չի դադարեցվի:

ԱՄՆ-ի հարձակումը բացասական արձագանք է առաջացրել միջազգային ասպարեզում: ՄԱԿ-ի գլխավոր քարտուղար Անտոնիու Գուտերշը ԱՄՆ-ի հարվածները անվանել է վտանգավոր էսկալացիա տարածաշրջանում և ուղղակի սպառնալիք միջազգային խաղաղությանն ու անվտանգությանը:

Ռուսաստանը խստորեն դատապարտել է ԱՄՆ-ի հարվածները Իրանի ատոմային օբյեկտներին՝ որպես միջազգային իրավունքի, ՄԱԿ-ի կանոնադրության և Անվտանգության խորհրդի բանաձևերի կոպիտ խախտում: Մոսկվան ՄԱԳԱՏԷ-ից սպասում է իրադարձություններին արժանյալ արձագանքի: ԱՄՆ-ի գործողությունները դատապարտել են նաև Կուբան ու Չինաստանը: