Խոշոր հրդեհ է բռնկվել Հոնկոնգի այսպես կոչված Նոր տարածքների Թայ Պո շրջանում գտնվող Վան Ֆուկ Քորթ համալիրի բարձրահարկ շենքերում: Հրդեհի հետևանքով զոհվել է առնվազն 36 մարդ, ավելի քան 270-ը անհետ կորած են համարվում։ Այս մասին հայտնել է South China Morning Post (SCMP) թերթը։

Թերթի տվյալներով՝ 29 մարդ հոսպիտալացվել է, որոնցից 7-ը գտնվում են ծանր վիճակում։ Հոնկոնգի իշխանությունները հրդեհի արագ տարածումը անվանել են «անսովոր» և խոստացել են քրեական հետաքննություն սկսել հրդեհի պատճառը պարզելու համար։

Հաղորդվում է, որ կրակը այրել է շենքերի վրա կոսմետիկ վերանորոգման համար տեղադրված բամբուկե կառույցները։ Համալիրում կա մոտ 2000 բնակարան և այնտեղ ապրում է մոտ 4000 բնակիչ։

Հրդեհը դասակարգվել է որպես ամենաբարձր մակարդակի։ Վերջին անգամ Հոնկոնգում 5-րդ մակարդակի հրդեհ է գրանցվել 2008 թվականին, երբ գիշերային ակումբում հրդեհի հետևանքով զոհվել էր չորս և վիրավորվել 55 մարդ։

ՉԺՀ Հոնկոնգի հատուկ վարչական շրջանի գործադիր տնօրեն Ջոն Լին (Լի Ջիաչաո) հայտարարել է դեկտեմբերի 7-ի տեղական ինքնակառավարման մարմինների ընտրությունների հետ կապված գործունեության դադարեցման մասին։ Նա նշել է, որ վարչակազմը քննարկում է ընտրությունները միջադեպի պատճառով հետաձգելու հարցը։

%post_link%