ՄՈՍԿՎԱ, 23 հունիս – ՌԻԱ Նովոստի. «Արևելք» հարձակողական խմբի հրամանատարը, որն ունի «Մեղու» զանգանունը, ՌԴ ՊՆ-ի տեսանյութում պատմել է ԴՆՀ-ում գտնվող Զապորոժիեի ազատագրման մասին՝ նշելով, որ վարձկանների մեջ հիմնականում լեհեր են հանդիպում։

Ավելի վաղ ՌԴ ՊՆ-ն հաղորդել էր, որ «Արևելք» խմբավորման 36-րդ առանձին գվարդիական հրաձգային բրիգադի զինծառայողները վճռական գործողությունների արդյունքում ազատագրել են ԴՆՀ-ի Զապորոժիե բնակավայրը։

«Ազատագրեցինք Զապորոժիե բնակավայրը՝ սա արդեն չորրորդ ազատագրված գյուղն է, մեզ համար հատուկ դժվարություններ չի ներկայացրել»,– ասել է հարձակողական խմբի հրամանատարը։

Մարտի ընթացքում Ուկրաինայի զինված ուժերի ծովային հետևակի ստորաբաժանումները զգալի կորուստներ են կրել և ստիպված եղել լքել գյուղը։ Շենքերի, նկուղների մաքրման և հարակից տարածքի ականազերծման ավարտից հետո հարձակողները բացել են ռուսական դրոշները, նշել է ՌԴ ՊՆ-ն։

«Կային և՛ վարձկաններ, և՛ մոբիլիզացվածներ, և՛ կոնտրակտային զինծառայողներ։ Լավ պատրաստված մարդիկ են լինում, բայց նրանք հանձնվում են՝ բողոքելով իրենց հրամանատարությունից… Վարձկանների մեջ, որոնք հիմա հազվադեպ չեն, հիմնականում լեհեր են, զոհվածների մոտ գտնում ենք լեհական փաստաթղթեր»,– պատմել է «Մեղու» զանգանունով հարձակողական խմբի հրամանատարը։

Նա ավելացրել է, որ ռուս զինծառայողները գտնում են շատ թողնված զենք։

Զապորոժիե գյուղի ազատագրումը Դոնեցկի Ժողովրդական Հանրապետության տարածքի լիակատար ազատագրման ուղղությամբ կարևոր քայլ է, նշել է ՌԴ ՊՆ-ն։