ՄՈՍԿՎԱ, 23 հունիս — ԱՄՆ նախագահ Դոնալդ Թրամփը հետևել է բոլոր ամերիկյան նախագահների օրինակին և սկսել է սեփական պատերազմը Մերձավոր Արևելքում։ Այս մասին ՌԻԱ Նովոստի գործակալությանը հայտնել է սենատոր Ալեքսեյ Պուշկովը՝ իր Telegram-ալիքում գրառում կատարելով։

«Ի վերջո, Թրամփը գնաց բոլոր ամերիկյան նախագահների ճանապարհով՝ սկսելով սեփական պատերազմը Մերձավոր Արևելքում։ Դեռ վերջերս նա դատապարտում էր նրանց, ովքեր 7 տրիլիոն դոլար ծախսեցին Իրաքի, Լիբիայի, Սիրիայի և Աֆղանստանի պատերազմների վրա։ Դեռ վերջերս նա պարծենում էր, որ պատերազմ չի սկսել։ Դեռ վերջերս դեմ լինողներին նշանակում էր կարևոր պետական պաշտոններում։ Դեռ վերջերս քննադատում էր (ԱՄՆ նախկին նախագահ Ջո) Բայդենին»,– գրել է պետական գործիչը։

Նրա կարծիքով, Թրամփը այժմ դարձել է նախագահ՝ սեփական պատերազմով, ինչպիսին են եղել Ջորջ Ուոքեր Բուշը, Բարաք Օբաման և Ջո Բայդենը։

ԱՄՆ-ն հունիսի 22-ի գիշերը հարվածներ է հասցրել Իրանի երեք միջուկային օբյեկտներին Նատանզում, Ֆորդոյում և Իսֆահանում։ Վաշինգտոնի խոսքով՝ հարձակումը նպատակ ուներ ոչնչացնել կամ լրջորեն թուլացնել Իրանի միջուկային ծրագիրը։ ԱՄՆ նախագահ Դոնալդ Թրամփի խոսքով՝ Թեհրանը պետք է համաձայնի «ավարտել այս պատերազմը», հակառակ դեպքում Իրանին սպասվում են շատ ավելի լուրջ հետևանքներ։

Միևնույն ժամանակ, ԱՄՆ փոխնախագահ Ջեյ Դի Վենսը, հարձակումներից հետո, որոնք Իրանում անվանել են բարբարոսական ու հանցագործ, հայտարարել է, որ ԱՄՆ-ը չի գտնվում պատերազմի վիճակում այս իսլամական հանրապետության հետ։

Իրանի ԱԳ նախարար Աբբաս Արաքչին նշել է, որ «կողմերի համար դիվանագիտության դուռը միշտ պետք է բաց լինի, բայց հիմա… բավականին այլ իրավիճակ է»։ Նրա խոսքով՝ հենց ԱՄՆ-ն է դավաճանել դիվանագիտությանը։ Իրանը կձեռնարկի բոլոր միջոցները՝ իր անվտանգությունն ու երկրի շահերը պաշտպանելու համար։

Իրանի ատոմային էներգիայի կազմակերպությունը հայտարարել է, որ երկրի միջուկային արդյունաբերության զարգացումը չի դադարեցվի։

ԱՄՆ-ի հարձակումը բացասական արձագանք է առաջացրել միջազգային ասպարեզում։ ՄԱԿ-ի գլխավոր քարտուղար Անտոնիու Գուտեռեշը այն անվանել է վտանգավոր սրացում տարածաշրջանում և միջազգային խաղաղությանն ու անվտանգությանը ուղղակի սպառնալիք։

Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ նշելով, որ դրանք կոպիտ խախտում են միջազգային իրավունքը, ՄԱԿ-ի կանոնադրությունը և Անվտանգության խորհրդի բանաձևերը։

Մոսկվան սպասում է, որ Միջուկային էներգիայի միջազգային գործակալությունը (ՄԱԳԱՏԷ) անաչառ կգնահատի իրադարձությունները։

ԱՄՆ-ի ռազմական գործողությունը դատապարտել են նաև Կուբան և Չինաստանը։