ՏԵՀՐԱՆ, հունիսի 22. ԱՄՆ-ի հարվածների հետևանքով Իրանի միջուկային օբյեկտներում վիրավորվողներ են եղել, սակայն ոչ ոք ռադիոակտիվ ճառագայթման չի ենթարկվել: Այս մասին հայտարարել Է Իրանի առողջապահության նախարարության պաշտոնական ներկայացուցիչ Հոսեյն Քերմանպուրը:

«Բարեբախտաբար, ԱՄՆ-ի ռմբակոծությունից հետո բուժկենտրոններ ուղարկված տուժողներից ոչ մեկը ռադիոակտիվ ճառագայթման չի ենթարկվել», – գրել է Քերմանպուրը:

ԱՄՆ-ն հունիսի 22-ի գիշերը հարվածներ է հասցրել Իրանի երեք միջուկային օբյեկտներին՝ Նաթանզում, Ֆորդոյում և Իսֆահանում: Վաշինգտոնի պնդմամբ, այս հարձակումը նախատեսված էր Իրանի միջուկային ծրագիրը ոչնչացնելու կամ լրջորեն թուլացնելու համար:

ԱՄՆ նախագահ Դոնալդ Թրամփը նշել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում: Միևնույն ժամանակ, ԱՄՆ փոխնախագահ Ջեյ Դի Վենսը ասել է, որ ԱՄՆ-ն պատերազմի մեջ չէ իսլամական հանրապետության հետ՝ չնայած Իրանը այդ հարվածները անվանել է վանդալական և հանցագործություն:

Իրանի արտաքին գործերի նախարար Աբբաս Արակչին նշել է, որ «դիվանագիտության դուռը միշտ պետք է բաց լինի, բայց հիմա… իրավիճակը այլ է»: Նրա խոսքերով՝ հենց ԱՄՆ-ն է դավաճանել դիվանագիտությանը: Իրանը կձեռնարկի բոլոր միջոցներն իր անվտանգությունն ու երկրի շահերը պաշտպանելու համար:

Իրանի ատոմային էներգիայի կազմակերպությունը հայտարարել է, որ երկրի միջուկային արդյունաբերության զարգացումը չի դադարեցվի:

ԱՄՆ-ի հարձակումը բացասական արձագանք է առաջացրել միջազգային ասպարեզում: ՄԱԿ-ի գլխավոր քարտուղար Անտոնիու Գուտեռեշը այդ հարվածները անվանել է տարածաշրջանում վտանգավոր սրացում և միջազգային խաղաղության ու անվտանգության ուղղակի սպառնալիք:

Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ որպես միջազգային իրավունքի, ՄԱԿ-ի Կանոնադրության և Անվտանգության խորհրդի բանաձևերի կոպիտ խախտում: Մոսկվան ՄԱԳԱԹԷ-ից ակնկալում է անաչառ արձագանք:

Կուբան և Չինաստանը նույնպես խիստ դատապարտել են ԱՄՆ-ի գործողությունները: