ՊԵԿԻՆ, հունիսի 22. ԱՄՆ-ի հարվածները Իրանի դեմ լրջորեն խախտում են ՄԱԿ-ի կանոնադրության նպատակներն ու սկզբունքները, ինչպես նաև միջազգային իրավունքը և սրում են լարվածությունը Մերձավոր Արևելքում: Այդ մասին կիրակի օրը հայտարարել է Չինաստանի արտաքին գործերի նախարարությունը:

«ԱՄՆ-ի գործողությունները լրջորեն խախտում են ՄԱԿ-ի կանոնադրության հիմնական նպատակներն ու սկզբունքները, ինչպես նաև միջազգային իրավունքը և սրում են լարվածությունը Մերձավոր Արևելքում», – նշված է ՉԺՀ ԱԳՆ-ի պաշտոնական հայտարարության մեջ:

ԱՄՆ-ն կիրակի գիշերը հարվածներ է հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում: Ամերիկայի նախագահ Դոնալդ Թրամփի խոսքերով՝ հարվածների նպատակը երկրի միջուկային հնարավորությունների սահմանափակումն էր: Նա հայտարարել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին սպասվում են շատ ավելի լուրջ հետևանքներ:

Իրանի արտաքին գործերի նախարար Աբաս Արակչին, մեկնաբանելով ԱՄՆ-ի հարձակումները, նշել է, որ «դիվանագիտության դուռը միշտ պետք է բաց լինի, բայց այս պահին… դա ճիշտ պահը չէ»: Նրա խոսքով՝ հենց ԱՄՆ-ն է դավաճանել դիվանագիտությանը: Իրանը կձեռնարկի բոլոր միջոցները՝ պաշտպանելու իր անվտանգությունն ու երկրի շահերը՝ «այնքան, որքան անհրաժեշտ կհամարի», ավելացրել է նա:

ԱՄՆ-ի հարձակումն արդեն բացասական արձագանք է առաջացրել միջազգային ասպարեզում: Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ դրանք համարելով միջազգային իրավունքի, ՄԱԿ-ի կանոնադրության և Անվտանգության խորհրդի բանաձևերի կոպիտ խախտում: Մոսկվան ՄԱԳԱԹԷ-ից սպասում է իրադարձություններին ազնիվ արձագանքի:

ՄԱԿ-ի գլխավոր քարտուղար Անտոնիու Գուտեռեշը ԱՄՆ-ի հարվածները անվանել է վտանգավոր սրման ակտ տարածաշրջանում և ուղղակի սպառնալիք միջազգային խաղաղությանն ու անվտանգությանը:

Կուբայի արտաքին գործերի նախարար Բրունո Ռոդրիգես Պարիլյան դատապարտել է ԱՄՆ-ի ագրեսիան Իրանի դեմ և այն անվանել հանցագործ, անպատասխանատու քայլ, որը խախտում է միջազգային իրավունքի նորմերը և կարող է հանգեցնել անկանխատեսելի հետևանքների:

Ռեպուբլիկացի կոնգրեսմեն Թոմաս Մասին ԱՄՆ-ի հարվածները Իրանին անվանել է սահմանադրությանը հակասող, իսկ դեմոկրատ կոնգրեսականուհի Ալեքսանդրիա Օկասիո-Կորտեզը (Նյու Յորք նահանգից) հայտարարել է, որ տեղի ունեցածը դատապարտման հիմք է: