2024 թվականի նոյեմբերին Հայաստանի պատմության ընթացքում գրանցված և աշխատանքով ապահովված աշխատատեղերի բացարձակ ռեկորդ է սահմանվել՝ կազմելով 782,832 աշխատատեղ։ Այս մասին հայտարարեց վարչապետ Նիկոլ Փաշինյանը՝ հունիսի 4-ին Ազգային ժողովում ներկայացնելով 2024 թվականի պետական բյուջեի կատարման տարեկան հաշվետվությունը։

«Սա նշանակում է, որ 2018 թվականի հեղափոխությունից հետո Հայաստանում ստեղծվել է 242,119 աշխատատեղ, ընդ որում՝ աշխատավարձով ապահովված։ Շատերը երբեմն կասկածում են վիճակագրությանը, սակայն այս տվյալները լիարժեք վստահելի են», — ընդգծեց վարչապետը։

Նրա խոսքով, միջին ամսական աշխատավարձը 2018 թվականի ապրիլին եղել է 173,996 դրամ, մինչդեռ 2025 թվականի ապրիլին՝ արդեն 304,992 դրամ։ Այսպիսով, աշխատավարձի աճը կազմել է մոտ 130 հազար դրամ կամ 70%։

«Նույն ժամանակահատվածում կուտակային գնաճը կազմել է 25%։ Այս տվյալները մեզ օգնում են պատասխանել կարևոր հարցին՝ մարդիկ այսօր ավելի լավ են ապրում, թե 2018-ին։ Այո՛, ավելի լավ։ Տեսականորեն՝ մարդիկ ապրում են մոտ 50 տոկոսով ավելի լավ, հաշվի առնելով գնաճը», — ասաց Փաշինյանը։

Վարչապետը շեշտեց, որ այս ամենը չի նշանակում, թե մարդիկ գոհ են․

«Մարդիկ ուզում են ավելի լավ ապրել, որովհետև տեսնում են, որ դա հնարավոր է այսօրվա Հայաստանում։ Մեր առաջադրանքը պետք է լինի՝ ապահովել գոհունակություն, ինչը մասշտաբային խնդիր է»։