ՄՈՍԿՎԱ, 22 հունիս — Անգլիայի կառավարությունը նախապես տեղեկացված է եղել ԱՄՆ-ի Իրանի միջուկային օբյեկտներին հարվածելու մասին։ Այդ մասին հայտնում է Sky News հեռուստաալիքը՝ հղում անելով Դաունինգ Ստրիթի աղբյուրներին։

«Ամերիկացիները նախապես տեղեկացրել են (Մեծ Բրիտանիայի) կառավարությանը իրենց հարվածի մասին»,- նշվել է հեռուստաալիքի կայքում՝ հղում կատարելով երկրի կառավարական աղբյուրներին։

Նախկինում հեռուստաալիքը պնդում էր, որ Մեծ Բրիտանիան, ենթադրաբար, չի մասնակցել ԱՄՆ-ի Իրանի միջուկային օբյեկտներին հասցրած հարվածներին։

ԱՄՆ-ն կիրակի գիշերը հարվածներ է հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում։ Ամերիկայի նախագահ Դոնալդ Թրամփի խոսքերով՝ հարվածի նպատակն էր սահմանափակել երկրի միջուկային հնարավորությունները։ Նա հայտարարել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին կսպասվեն շատ ավելի լուրջ հետևանքներ։

Թեհրանը պահանջել է ՄԱԿ-ի Անվտանգության խորհրդի և Միջուկային էներգիայի միջազգային գործակալության (ՄԱԳԱՏԷ) կառավարիչների խորհրդի արտակարգ նիստ հրավիրել։

Իրանի խորհրդարանում նշել են, որ Թեհրանը նախապես ակնկալել է հարձակումը Ֆորդոյի միջուկային օբյեկտի վրա, ինչի պատճառով իրականացրել է էվակուացիա։ Օբյեկտն անդառնալի վնաս չի ստացել։

Երկրի Ատոմային էներգիայի կազմակերպությունը ընդգծել է, որ Թեհրանը չի պատրաստվում դադարեցնել միջուկային ոլորտի զարգացումը հարվածներից հետո։

Իրանի Միջուկային անվտանգության կենտրոնը հայտնել է, որ միջուկային օբյեկտներում՝ ԱՄՆ-ի հարձակման ենթարկված, ռադիոակտիվ նյութերի արտահոսք չի գրանցվել։

ՄԱԳԱՏԷ-ն, իր հերթին, նշել է, որ դեռևս չի գրանցել ռադիացիայի մակարդակի բարձրացում այս միջուկային օբյեկտներից դուրս։

Այս հարձակումն արդեն բացասական արձագանք է առաջացրել թե՛ միջազգային ասպարեզում, թե՛ հենց ԱՄՆ-ում։ ՄԱԿ-ի գլխավոր քարտուղար Անտոնիո Գուտեռեսը այն անվանել է վտանգավոր էսկալացիա տարածաշրջանում և միջազգային խաղաղության ու անվտանգության համար ուղղակի սպառնալիք։

Հանրապետականներից կոնգրեսմեն Թոմաս Մասին Իրանին հասցրած հարվածներն անվանել է ԱՄՆ սահմանադրությանը հակասող, իսկ դեմոկրատ կոնգրեսական Ալեքսանդրիա Օկասիո-Կորտեսը հայտարարել է, որ տեղի ունեցածը կարող է հիմք հանդիսանալ պաշտոնանկության համար։