ՄՈՍԿՎԱ, 22 հունիս – ԱՄՆ նախագահի հատուկ ներկայացուցիչ Ռիչարդ Գրենելը X սոցցանցում դիմել է ամերիկացի գործարար Իլոն Մասկին՝ խնդրելով, որ նա SpaceX ընկերության Starlink արբանյակային ինտերնետ ծառայությունը Իրանում անվճար դարձնի հաջորդ մի քանի շաբաթների ընթացքում: «Իլոն Մասկ, կարո՞ղ ես Starlink-ը Իրանում անվճար դարձնել հաջորդ մի քանի շաբաթվա ընթացքում: Իրանի իմ ընկերներն այժմ կայուն տեղեկատվության հասանելիություն չունեն», — գրել է Գրենելը: Նա ավելացրել է, որ ինքը պատրաստ է «նվիրատվություններ» կատարել և հույս է հայտնել, որ ուրիշներն էլ կհետևեն իր օրինակին:

Starlink-ը արբանյակային ցանց է, որը նախատեսված է ամբողջ աշխարհում բարձրարագ ինտերնետ մատուցելու համար:

Իսրայելը հունիսի 13-ի գիշերը ռազմական գործողություն սկսեց Իրանի դեմ՝ մեղադրելով վերջինիս գաղտնի ռազմա-միջուկային ծրագրի իրականացման մեջ: Օդային հարվածների և դիվերսիոն խմբերի գործողությունների թիրախներ են դարձել միջուկային օբյեկտները, բարձրաստիճան զինվորականները, ականավոր միջուկային ֆիզիկոսները, օդանավակայանները, հակաօդային պաշտպանության համակարգերը և «գետին-գետին» հրթիռները: Իրանը հերքում է, որ իր միջուկային ծրագիրը ռազմական բնույթ ունի:

Հունիսի 18-ին ՄԱԳԱՏԷ-ի գլխավոր տնօրեն Ռաֆայել Գրոսին հայտարարել է, որ գործակալության տեսուչները կոնկրետ ապացույցներ չեն տեսել, որ Իրանը աշխատում է միջուկային զենք ստեղծելու ծրագրի վրա: ԱՄՆ հատուկ ծառայությունները, ի հակադրություն նախագահ Դոնալդ Թրամփի և Իսրայելի հայտարարությունների, եզրակացրել են, որ Իրանը չի ձգտում միջուկային զենք ստեղծել:

Միացյալ Թագավորության նախկին դեսպան Ուզբեկստանում Քրեյգ Մյուրեյը հայտարարել է, որ Իրանն աներևակայելի համբերություն և խաղաղասիրություն է ցուցաբերել վերջին մի քանի տարիներին՝ չնայած Իսրայելի գործողություններին:

Իրանը պատասխանում է Իսրայելի գործողություններին հրթիռակոծություններով և անօդաչու թռչող սարքերի հարվածներով՝ հայտարարելով, որ հարվածներ է հասցնում ռազմական օբյեկտներին: Երկու կողմերից էլ աճում է քաղաքացիական բնակելի շենքերին հարվածների և խաղաղ բնակիչների զոհերի թիվը:

Իրանի առողջապահության նախարարության տվյալներով՝ երկրում զոհվել է ավելի քան 400 մարդ, վիրավորվել՝ առնվազն 3 հազար: Իսրայելում հայտարարել են, որ իրանական հարվածների հետևանքով զոհվել է ավելի քան 20 մարդ, վիրավորվել՝ ավելի քան 1,2 հազար:

Իսրայելն ու Իրանը օրական մի քանի անգամ փոխանակվում են հարվածներով: Իսրայելի իշխանությունները սպառնում են շարունակել ռազմական գործողությունները մինչև Իրանի միջուկային ծրագրի ոչնչացումը: Թեհրանն էլ իր հերթին մտադիր է շարունակել Իսրայելի վրա հարվածները, մինչև վերջինս չդադարեցնի ռմբակոծությունները: