ՄՈՍԿՎԱ, հունիսի 21. ՌԻԱ Նովոստի. Արևմուտքի ցայտուն հեգեմոնիան Եվրասիայում ուժով պարտադրելու արկածախնդրությունը, որի նպատակը Ուկրաինան Ռուսաստանից կտրելն էր, ձախողվել է և ոչնչացրել է ուկրաինական պետականությունը,- հայտարարել է Պետդումայի միջազգային հարաբերությունների կոմիտեի ղեկավար Լեոնիդ Սլուցկին:

«Ազգակիցների սպանությանը հանգեցնող այս նախագծի գաղափարախոսները ստիպված կլինեն ընդունել դրա ձախողումը: Որքան շուտ, այնքան լավ», — գրել է նա իր հաղորդագրություններից մեկում:

Նրա խոսքով՝ Ուկրաինան անտեսվում է. ՆԱՏՕ-ի հունիսյան գագաթնաժողովում Ուկրաինայի հարցին նվիրված նիստը չեղարկվել է, իսկ Վլադիմիր Զելենսկին հրավիրված է միայն գագաթնաժողովի բացման ժամանակ կայանալիք ընթրիքին:

«Պաշտոնապես պատճառաբանվում է Թրամփի զբաղվածությամբ: Բայց իսկական պատճառն այն է, որ ԱՄՆ նոր վարչակազմը այլևս առաջնահերթ չի համարում Ուկրաինական պատերազմին աջակցել՝ մինչև վերջին ուկրաինացու մահը», — ավելացրել է քաղաքական գործիչը:

Սլուցկին նշել է, որ ՌԴ նախագահ Վլադիմիր Պուտինը հստակ արտահայտել է Ռուսաստանի պահանջները՝ Ուկրաինան պետք է լինի միջուկային զենքից զուրկ և չեզոք:

«Այո, Ուկրաինան արժանի է ավելի լավ ճակատագրի, քան լինել Արևմուտքի ռուսատյացության տիկնիկը: Ռուսներն ու ուկրաինացիները սլավոնական եղբայրական ժողովուրդներ են, որոնք կապված են մեկ քաղաքակրթական կոդով: Իրականում՝ «մեկ ժողովուրդ», ինչպես ասել է ՌԴ նախագահը ՊՄԵՖ-ի համաժողովում», — ամփոփել է Պետդումայի կոմիտեի ղեկավարը:

ՆԱՏՕ-ի գագաթնաժողովը նախատեսված է հունիսի 24-25-ին Հաագայում: Ինչպես հաղորդվել է, գագաթնաժողովի ծրագիրը կրճատվել է, որպեսզի չհոգնեցնի ԱՄՆ նախագահ Դոնալդ Թրամփին: Այս զիջումներից մեկը կլինի «Ուկրաինա-ՆԱՏՕ» խորհրդի նիստի բացակայությունը: Կազմակերպիչները փորձում են խուսափել նաև նոր վեճերից, ներառյալ Զելենսկու հետ: