Օգոստոսի 15-ին Կոտայքի մարզում տեղի է ունեցել ավազակային հարձակում՝ զենքի միջոցով։ Ոստիկանության Կոտայքի մարզային քրեական ոստիկանությունը ստացել է օպերատիվ տեղեկություն, որ քաղաքացու ավտոմեքենան զենքի սպառնալիքի տակ է հափշտակվել, և այն շարժվում էր Երևան-Սևան ճանապարհով՝ «Չայնիի ոլորաններ» հատվածում։

Իրավապահ մարմինների գործողությունների արդյունքում պարզվել է, որ հանցագործություն կատարած անձը 33-ամյա Կարեն Կ․-ն է՝ Կոտայքի մարզից, իսկ տուժողը 49-ամյա Արթուր Հ․-ն է՝ Արարատի մարզից։ Արթուր Հ․-ն «Յանդեքս» տաքսի ծառայության վարորդ է, ով Աբովյան քաղաքում պատվեր էր ունեցել։ Այդտեղ է զենքի սպառնալիքով գողացվել իր «Hongqi» մակնիշի ավտոմեքենան։

Կոտայքի քրեական ոստիկանության աշխատակիցները և պարեկային ուժերը Կարեն Կ․-ին ձերբակալել են Երևանի-Սևան մայրուղու «Չայնիի ոլորանների» Ջրաբերի գազալցակայանի մոտից՝ ավազակություն կատարելու անմիջական կասկածանքով։ Նրան նախապես տեղափոխել են «Աբովյան» բժշկական կենտրոն բուժօգնություն ստանալու, որից հետո՝ Կոտայքի մարզային քրեական վարչություն։

Հայտնաբերվել են գողացված ավտոմեքենան և գործիք հանդիսացող հրազենը։

Դեպքի փաստով Կոտայքի մարզային քրեական վարչությունում կազմվել են փաստաթղթեր, որոնք փոխանցվել են ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժին։