Ուկրաինայի նախագահ Վլադիմիր Զելենսկին հաստատել է, որ այսօր զրուցել է Եվրամիության երկրների ղեկավարների հետ։ Իր Telegram-ալիքում նշել է, որ Կիևի դիրքորոշումը պարզ է. անհրաժեշտ է հասնել իրական և երկարատև խաղաղության, որքան հնարավոր է շուտ դադարեցնել սպանությունները, կրակը մարտի դաշտում, օդում և նավահանգիստների ենթակառուցվածքի դեմ, ինչպես նաև ազատել բոլոր ուկրաինացի ռազմագերիներին և քաղաքացիական անձանց և վերադարձնել Ռուսաստանի կողմից առևանգված երեխաներին։

«Մեր հազարավոր մարդիկ դեռ գերված են, պետք է վերադարձնել նրանց տուն։ Պետք է պահպանել ճնշումը Ռուսաստանի վրա, քանի դեռ շարունակվում են ագրեսիան և օկուպացիան», — նշել է Զելենսկին։ Նա նաև պատմել է, որ ասել է Թրամփին՝ եթե եռակողմ գագաթնաժողովը չկայանա կամ Ռուսաստանը խուսափի ազնիվ կերպով ավարտել կոնֆլիկտը, պատասխանը պետք է լինի սանկցիաների խստացումը։ Նրա խոսքով, դրանք արդյունավետ գործիք են։ Բացի այդ, անհրաժեշտ է ապահովել Ուկրաինայի երկարաժամկետ անվտանգությունը Եվրոպայի և ԱՄՆ-ի մասնակցությամբ։

«Ուկրաինայի համար կարևոր բոլոր հարցերը պետք է քննարկվեն Ուկրաինայի մասնակցությամբ, և ոչ մի հարց, հատկապես տարածքային, չի կարող լուծվել առանց Ուկրաինայի», — նշել է նա։ «Շնորհակալություն գործընկերներին, ովքեր օգնում են. այսօր կա եվրոպացի առաջնորդների կարևոր հայտարարություն, որը ամրապնդում է մեր դիրքորոշումը։ Շարունակում ենք աշխատել միասին՝ եվրոպացիներ, ամերիկացիներ, ամբողջ աշխարհում նրանք, ովքեր ցանկանում են խաղաղություն և անդորր միջազգային հարաբերություններում»։

Զելենսկին արդեն հայտնել է, որ երկուշաբթի կուղևորվի ԱՄՆ՝ Թրամփի հետ բանակցություններ անցկացնելու։ Նա աջակցել է եռակողմ հանդիպման գաղափարին և ավելացրել, որ հիմնական հարցերի քննարկումը հնարավոր է միայն առաջնորդների մակարդակով։