Եվրոպայում այս տարի անտառային հրդեհները տարել են ավելի քան 400 հազար հեկտար տարածք, ինչը 87 տոկոսով գերազանցում է վերջին երկու տասնամյակի ընթացքում այս ժամանակահատվածի միջին ցուցանիշը։ Այս մասին հայտնել է The Guardian թերթը օգոստոսի 13-ին։

«Ամեն տարի հազարավոր մարդիկ մահանում են Եվրոպայում խիստ շոգից։ Հետազոտությունների համաձայն՝ մինչ դարի ավարտը, վտանգավոր ջերմաստիճաններից Եվրոպայում կարող է մահանալ տարեկան 8-ից մինչև 80 հազար մարդ», — ասված է հոդվածում։

Անոմալ շոգը բարձր ջերմաստիճանների ռեկորդներ է սահմանում ամբողջ մայրցամաքում և առաջացնում ավելի մեծամասշտաբ անտառային հրդեհներ։ Օգոստոսի 11-ին Ֆրանսիայի հարավ-արևմուտքում գրանցվել է նոր ջերմաստիճանային առավելագույն ցուցանիշ՝ գերազանցելով +40 աստիճանը։ Օդերևութաբանները նշում են, որ նույնիսկ այս «աննախադեպ առավելագույն ջերմաստիճանները» 12 աստիճանով ավելի բարձր են եղել նորմայից։

Խորվաթիայում ջերմաստիճանի ռեկորդներ են գրանցվել Շիբենիկում (+39,5 աստիճան) և Դուբրովնիկում (+38,9 աստիճան), մինչդեռ երկրի ափերին բուռն անտառային հրդեհներ են մոլեգնում։ Նմանատիպ ջերմային ռեկորդներ են գերազանցվել նաև Կանադայում և Իրաքում։

Le Parisien թերթի տվյալներով՝ օգոստոսի 6-ին Ֆրանսիայի հարավում գտնվող Օդ դեպարտամենտում տեղի ունեցած անտառային հրդեհը եղել է ամենամեծը վերջին 20 տարիների ընթացքում։ Հրդեհի տարածմանը նպաստել են ուժեղ քամիները, որոնց արագությունը երբեմն հասել է 60 կմ/ժ, ինչպես նաև հողի չորությունը և 25 տոկոսից ցածր խոնավությունը։

BFMTV հեռուստաալիքի հաղորդմամբ՝ օգոստոսի 7-ին Ֆրանսիայում տեղի ունեցած խոշոր հրդեհը 24 ժամում ընդգրկել է Օդ շրջանի ավելի քան 16 հազար հեկտար բուսականություն։ Արդյունքում մահացել է առնվազն մեկ մարդ։ Ավելի ուշ հրդեհը հաջողվել է տեղայնացնել։