ՆՅՅՈՐԿ, 4 հուլիսի – Ամերիկացի Ջոյի Չեսթնաթը, որին մականունով «Ճռռան» են կոչում, չկարողացավ գերազանցել սեփական աշխարհի ռեկորդը հոտ դոգերի ուտելու մրցույթում։ Տասը րոպեում նա կերավ ընդամենը 70,5 հատ, սակայն միևնույն է հաղթեց մրցակիցներին։

Մրցույթի բազմամյա հաղթող Չեսթնաթը չկարողացավ գերազանցել 2021 թվականին սեփական սահմանած ռեկորդը՝ 76 հոտ դոգ։ Անցած տարվա «տարվա ուտող» Պատրիկ Բերտոլետին այս տարի կարողացավ ուտել ընդամենը 46,5 հաց՝ նրբերշիկով (նախորդ տարի՝ 58)։

Սա Չեսթնաթի 17-րդ հաղթանակն է։ Անցած տարի նա բաց էր թողել մրցույթը, քանի որ որակազրկվել էր բուսական միս արտադրող ընկերության հետ համագործակցելու պատճառով։ Այդ ընկերությունը մրցակցում էր մրցույթը կազմակերպող ընկերության հետ։

Կանանց մրցույթում հաղթեց Միքի Սուդոն՝ տասը րոպեում կերելով 33 հոտ դոգ։ Անցած տարի նա էլ սահմանել էր կանանց մրցույթի ռեկորդ՝ 51 հաց՝ նրբերշիկով։

Ինչպես տղամարդկանց, այնպես էլ կանանց մրցույթում առաջին տեղի մրցանակը կազմում է 10 հազար դոլար։

Nathan’s Famous Hot Dog Eating Contest մրցույթը ամեն տարի անցկացվում է Նյու Յորքում՝ հուլիսի 4-ին, ԱՄՆ-ի Անկախության օրը։ Հոտ դոգերի արագությամբ ուտելու առաջին մրցույթը տեղի է ունեցել 1916 թվականին, երբ իռլանդացի Ջիմ Մալլենը 12 րոպեում կերել էր 13 նրբերշիկ։ Ըստ լեգենդի՝ նա դա արել էր գրազի համար։

Այդ ժամանակից մրցույթը չի անցկացվել միայն Երկրորդ համաշխարհային պատերազմի տարիներին։

Սովորաբար մասնակիցները հացը առանձին են թրջում ջրով՝ ստվարաթղթե բաժակների մեջ, սեղմում են խմորը, որպեսզի այն քիչ տեղ զբաղեցնի, և հետո ուտում։ Նրբերշիկները ուտում են առանձին։